Федерациялул Советрай шанма гьантлий дурсса даврил хIасиллу дуллай, Федерациялул Советрал председатель Валентина Матвиенкол журналистътурахь бувсунни, Дагъусттаннал вакилтал ххуйну хIадур хьуну бивкIшиву комитетирттайсса заседаниярттайн, аьщуйн щусса ихтилатру хьушиву, цукунсса масъалартту хьхьичIун ласун багьлай буссарив, цуми цIуцIи кIанттах уттира къулагъас ххидуван багьлай буссарив.
Дагъусттаннал хъунама Сергей Меликовлул, балжийну цуку-цукунсса масъалартту буссарив ххалуйх лаххаврицIун, бувсунни ми бартбигьинсса ххуллу-чараннугу цумирив, аьмну республикалул социал-экономикалул тагьар ххуйсса даражалийн гьаз дуваншиврул цукунсса давуртту дуллан аьркинссарив. «Дагъусттаннал масъаларттан федерал властьрал кумаг аьркинни. Шиннардил лахъишиврий дузал къабувну лахъи лавгсса масъалартту республикалуща цащавалу бартбигьин хьун кунмасса бакъар. Аьрасатнал Президент Владимир Путиннул тапшур бунни Дагъусттаннал чIарав бацIан.
Федерациялул Советрал депутатътурал кьамул бувсса хIукмулува чIалантIиссар цукунсса кумаг аьркинну буссарив федерал центрданул чулуха. Жугу вай хIукмурду бартбигьаврил ялув бацIантIиссару», – увкунни Матвиенкол. Сергей Меликовлул Матвиенкойн Дагъусттаннайн хъамалу оьвтIий ушиву буслай, чIурчIав дунни гьашину ДАССР хIасул хьуну 100 шин хъанай духьувкун, Федерациялул Советрал спикер Дагъусттаннайн бучIаву, му юбилейрансса хъинсса бахшиш хьунтIишиву.
