Март зурул 18-нний имам Шамиллул цIанийсса Ухссавнил Ккавкказуллал гуманитар колледжраву щалагу Аьрасатнал поэзиялул кьинилун хасну тIиртIунни Расул ХIамзатовлун хас дурсса стенд.
Мероприятие сакин дурну дия ДР-лул Чичултрал союзращал цачIуну. Шикку гьуртту хьунни «Московский литератор» кказитрал редактор Иван Голубничий, ДР-лул миллатирттал политикалул ва диндалул иширттал министрнал бигарду биттур буллалисса Энрик Муслимов, ДР-лул Хъунисриннал советрал председательнал хъиривчу Сиражуттин Илиясов, Аьрасатнал пианист Хан Баширов, колледжрал преподаватель, чичу Хизри Илиясов, шаэртал Алексей ХIажиев ва Аминат Аьбдулманапова, имам Шамиллул ва Расул ХIамзатовлул цIанийсса фондирттал хъуними ва цаймигу.
Расул ХIамзатов дакIнийн утлатисса ва мунал творчествалун лавайсса кьиматру бишлашисса ихтилатру бунни Энрик Муслимовлул, Сиражуттин Илиясовлул, Хан Башировлул.
Хизри Илиясовлул цала ихтилатраву бувсунни Расул ХIамзатов бакIчисса Дагъусттаннал Чичултрал союзрал ва Мариям Илиясовал цIанийсса «Дараччи» клубрал хIала-гьурттусса давурттая. Мукун, вай кIивайнналвагу сипталийн бувну, чивчуну бивкIссар Авгъаннава аьрал буккан баву тIалав буллалисса чагъарду. Му бакъассагу, вайннал чирчуну диркIссар АьФ-лул Президентнайнсса ва ЮНЕСКО-лул хъунаманайнсса Ниттихъал кьини хIасул даврил хIакъиравусса обращениягу. 1998 шинал январь зурул 30-нний Борис Ельциннул хIукму бувссар Ниттихъал кьини кIицI лаглансса.
Хъамаллуран музыкалул программа ккаккан дуруна МухIсим Камаловлул, ПатIимат ХIажиевал ва СалихIат Валиевал. Ахирданий цинявппагу гьурттучитурал бунни колледжравух экскурсия ва хъамаллуращал рирщунни дакIний личIансса суратру.
