Агьамшиву ххисса объектру къулагъасрайн ларсунни

Агьамшиву ххисса объектру къулагъасрайн ларсунни

Март зурул 2-нний Федерациялул Советрал Комитетрал заседаниялий Дагъусттаннал къуллугъчитурал гьаз бунни Республикалий строительствалул агьамсса объектру давринсса арцу итадакьаврил хIакъиравусса масъалартту.

Заседаниялий гьуртту хьунни Дагъусттаннал БакIчи Сергей Меликов ва республикалул властьрал органнал вакилтал.
ХьхьичI ххуттай дан аьркинсса строительствалул объектру анавар дуккан даврил хIакъиравусса гьарта-гьарзасса доклад бунни Дагъусттаннал экономикалул министр Руслан Аьлиевлул.
Ванал бувсунни, хIакьинусса кьини республикалий дуллай дайдирхьусса ва дузрайн ду­ккан къадурсса строительствардал масъала яла цIюрувкьумур бушиву. ЦIанасса ппурттуву республикалий къуртал къадур­сса I354 строительствалул объект сияхIрай дур. Вай объектру дурну къуртал дан аьркин дагьлай дур 41,4 млрд. арцул.

Руслан Аьлиевлул кIицI лавгунни, Республикалий дуллай дайдирхьуну лахъи лаган дурсса строительстварду дузрайн ду­ккан даву мурадрай зузи дурну душиву миннун хасъсса пилотный проект.
Дуллай дайдирхьуну лахъи лаган дурсса строительствалул объектру дур хъунмурчIин республикалул бюджетрал гуж биял къахъанахъисса. Анаварсса бущилий дан аьркинсса строительствалул сияхIрай дур 14 объект: МахIачкъалалив, Хасавюртрай, Буйнакскалий, Къизлардай, Дагъусттаннал Огнилий ва Сухокумскалий канализациярттал сооруженияртту даврил, кIира объект щинал дузал даврил, шанна объект цIуллу-сагъшиву дуруччаврил ва шанна объект цIуминалийсса ЦIуссалакрал райондалий ххуллурдал хозяйствардал строительствалул даврил.
ЛичIинува кIицI лавгунни МахIачкъала шагьрулул канализация цIу дуккан даврил ва гьарта-гьарза даврил масъала. ЧIалай бур ва объект цIу дуккан даврингу биялсса харжлугъ бишин багьлай бушиву. Руслан Аьлиевлул ва ххуллухсса совещаниялий личIиссава къулагъасрайн лавсун, кIицI бунни цIуминалийсса ЦIуссалакрал райондалул щархъавусса ххуллурдайсса сетирдал масъалагу.
Министрнал ихтилатрая махъ, къуртал къадурсса строительствардал хIакъираву бувчIин бавуртту дунни Дагъусттаннал БакIчи Сергей Меликовлул.

«ХIакьину совещаниялий кIицI ларгсса «лахъи лаган дур­сса» строительствалул 14 объектру, республикалун хъуннасса агьамшиву дусса хъанахъиссар. Цаппара объектру лахъи лаган даврил сававгу дур проектно-сметный документация дунагу, строительствалул давуртту дайкъадирхьуну душиву. Укун­сса объектру дур Счетный палаталул проектно-сметный документация душиврийн бувну, строительствалул даву дайкъадирхьуну дунагу къуртал къадур­сса строительствардал сияхIрайн ларсун. Дуссар республикалий личIи-личIисса программарттал лагрулий дуллай дайдирхьусса, пандемия сававну махъун дагьсса строительствардугу. Март зурул 15-нний АьФ-лул Счетный палаталул ххал дигьинтIиссар вай объектирдал тагьар. Совещаниялий кIицI лавгсса объектирдавун хъунмурчIин духлахиссар Федерал цIакусса программар­ттайхчин дуллай байбивхьуну бивкIсса ва миннунсса арцу итадакьаву дацIан дурну диркIсса объектру. «Жуща вай объектру республикалул бюджетравасса арцуйну дуллан бюхълай бакъар, цанчирчан вай цIакусса Федерал программарттал лагрулий дуллай диркIун тIий», – увкунни Сергей Меликовлул.
Заседаниялул хIасиллайн бувну АьФ-лул ПаччахIлугърайн тапшур бунни 2022 ва 2023-2024 шиннардийнсса бюджет хIасул буллалийни Федерал бюджетрава Дагъусттаннал Республикалун тIалав дурсса арцу итадакьин.

Читайте также: