Федерациялул Советрай – ДР-лул ссят

Федерациялул Советрай – ДР-лул ссят

Мартрал 3-нний Москавлив, АьФ-лул Федерал Собраниялул Федерациялул Советрай яла агьаммур ишну хьунни Федерациялул Советрал 500-мур батIаву. Муний хьунни «АьФ-лул субъектрал ссят». ДР-лун хас бувсса мажлис тIивтIунни Аьрасатнал Федерациялул Председатель Валентина Матвиенкол ва яла махъ буллунни Дагъусттаннал БакIчи Сергей Меликовлухьхьун. Республикалул каялувчинал бувсунни региондалул социал-экономикалул лябуккулул ххуллурдал хIакъираву.

БакIрай мунал бувсунни Дагъусттаннал каширдая, региондалул хьхьичIсса масъаларттая, Дарбант шагьрулул лябу­ккулул иширттая, буллай бачIину ливчIсса объектирдая, региондалул лябуккулул планная, АПК лябуккан баврия.

Яла махъ лавхъунни Валентина Матвиенкол. Мунил тIимунийну, Дагъусттан ляличIисса регион бур. «Дагъусттаннал хъунмур авданшиву муданна диркIссар микку ялапар хъанахъисса инсантурайну, ми бур цала улклун дакI тIайласса, захIмат ххирасса, дакI тIиртIусса инсантал», – кунни мунил. Федерациялул Советрал Председательнал кIицI бунни Да­гъусттаннал халкьуннал культуралул батIул буван къашай­сса бутIану бушиву халкьуннал касмурду-бархъаллал синааьрщарал тIахIунттив, оьргърал тIаннуй накьич дишаву, арцу-мусил заргалшиву, халичар­тту баву. Махъ бакъа, кунни мунил, ми касмурду ирсирай дачин дуван аьркинни. Валентина Матвиенкол Федерациялул СоветрачIасса Интеллектуал хъус-хъиншиврул масъалар­ттал советрайн тапшур бунни му ххуллий Дагъусттаннан шайсса кумаг буван.

Мунил мукунма бувсунни уттигъанну къулбас дурсса программалий ккаккан бувну бушиву 2025 шинайннин газ буцин республикалул циняв халкьуннал ужагъирттавун.
Ихтилат хьунни мукунма национал проектру бартдигьаврил, инсантал къатрал дузал баврил, цIуллушиву дуруччаврил система ххуй-хъин даврил, демографиялул, оьрчIал багъирдал ва школарттал дузал баврил ва цаймигу масъаларттал хIакъираву. Валентина Матвиенкол бувсунни ми масъалартту бакIуйн буккан буван кумаг бантIий бушиву.
БатIаврий Валентина Матвиенкол Сергей Меликовлун буллунни хъамакъабитулунсса вымпел ва «Федерациялул Советран 25 шин» тIисса медаль.

Читайте также: