Синааьрщарал ва чарил караматру

Синааьрщарал ва чарил караматру

Ларгсса нюжмардий Ярагъскийл ДГПУ-лул художествалул ва графикалул факультетрай хьунни синааьрщарая ва чария дурсса затирттал выставка. Ванил авторну ия ва факультет­рал педагог, профессор, Дагъусттаннал лайкь хьусса художник МахIаммад Оьмаров.


Залму АьбдурахIманова
Шиккун автор цала цалчинсса проектращал барча ан бувкIун бия республикалий цIа ларгсса художниктал, архитектортал, муаьллимтал ва студентътал. Бия хъамаллуравух чIаххуврайсса Чачаннава бувкIсса художникталгу. Факультетрал хIаятраву дурсса ва выставкалул дия аьжаивну ссигъасса тIfаьншиву. НякIсса ссавнилу ва хIаятравусса мурхьирдал ххютулусса майданнив ца ххуйну чIалай дия зун­ттал душнил сипат дирхьусса хъун дакъасса чарил гьайкал, личIи-личIисса лагрулул урхьри ва нетIакурду, зюннав-дачIу ва гармун-ччергъилу ришлашисса персонажтал ва цаймигу декорациялул давуртту. МахIаммадлул канила дурксса давуртту дакъа­сса, шикку дия ванал студентътурал ва дус-ихтивартурал давурттугу.

ДГПУ-луву зузиссаксса хIаллай МахIаммад Оьмаровлул тарбия бувну, цала пиша ла­хьхьин бувну бур ва касмулух гъира бусса ттуршахъул студентътуран. ВаначIа дуклай бивкIсса лахьхьусса студентътал хIакьину, ца жула республикалий бакъа, мунил кьатIувгу цIа дурксса усттартуран-художниктуран ккаллину бур.
«Дагъусттаннал шяравалу» тIисса Музей-заповедникрал хъунмур Зумрут Сулаймановал, МахIаммад Оьмаров барчагу увну, кIицI бувунни художникнал цала студентътуращал Дагъусттаннал художествалул ва касмурдал магьирлугъ дуру­ччавриву хъуннасса даву дуллалишиву.

— Художествалул колледжир­ттаву, вузирдал факультетирттай цукунчIав къатIайлассар вай касмурду лахьхьин дуллалисса ссятру чан дуллалавуртту. Вай жунyа жула буттал буттахъал ирсирай ядан, дуруччин дуллу­сса хъус-ххазинардур, — увкунни З. Сулаймановал.

Выставкалийн бувкIсса хъамаллурал махъру лавхъун махъ авторнал, цинявннахь барчаллагьгу куну, кIицI бувунни жагьилмур ник тарбия дуллан аьркиншиву жула буттал буттахъал захIмат, миннал хасиятру эбрат­ран дуцлай.
Шиккува МахIаммад Оьмаровлул студентътурал хъамаллуран ккаккан бувунни синааьрщарая тIахIунтту даврил ва чарий накьичру дишаврил мастер-классру.

Читайте также: