[dropcap]З[/dropcap]урул хьхьичI «Илчи» кказитрал редакциялийн хъинну хъювусулну бувкIун бия Чаллаева Любовь Александровна. Дагъусттаннал цIуллу-сагъшиву дуруччаврил министрнал хъиривчуну, Тарумовкаллал райондалул администрациялул бакIчинал хъиривчуну зий ивкIсса, СССР-данул цIуллу-сагъшиву дуруччаврил отличник, аьпабиву, Гъазибаг Чаллаевлул кулпат.

---

Зулайхат Тахакьаева
Ва хъювусул буккансса сававнугу хьуну дия ацIния ххюра шинал оьрмулий дунияллия лавгсса арс Щамххаллул аьпалун Хъусрахь, Уттубивхьу-Зунттул ухнилу, бувсса щаращи ла-ялун бувну лякъаву.

— Май зурул 13-нний хьунтIиссия Щамххал дунияллийн увккун 50 шин, 18-нний тIурча, хьуссар дунияллия лавгун 35 шин. Вай кIирагу аьпалул кьинирду кIицI дан хъунама арснащал, Альбертлущал, лавгссияв шяравун. Бивссияв щаращуйнгу. КIикку тIурча, ва сурат ххал хьунни, — тIий, чарийсса Щамххаллул суратрал лагмава ттупанграл ккуллардал аьшругу дусса шакил ккаккан дурунни ттун Любал. Куц лиян бувсса щаращигу кка­ккан бувунни.

— Щамххал ивкIусса чIумал на хъинну гъюжу бувккун буссияв, — дакIнийн бутлай бур Люба. — Иттав макь кьакьлай дакъая. Къуплива хъячиннин силул ччурччуну ларгсса тIутIи куна, чIавасса оьрмулий азарданул ччуччин увсса арснал гьавгу кьадиртун, ттула ужагърайн зана хьунсса дакI дакъая.
Ца кьини Гъазибаг увкIуна лухччиния, щинал шушагу ларсун: «Вай вил макьри», — тIий. Гай щинал ттуйн хIал бучIан бувна. Гъазибаглухь буца куну, лавгссияв ттунна дарувну хьусса щинал щаращуйн.

[dropcap]Ш[/dropcap]яраваллия биялну архсса кIанттай бия му щаращи ливчусса кIану. КIикку лагма къурув няй-няй тIисса бургъилух зузисса инсантал ххал хьувкун, пикри хьуна цуксса чири къахьунссар, мякьнал щин хIачIаван, ва кIанттай ттула Щамххаллул аьпалун щаращи барча тIисса. Гьарца нахIала буллалиманал алхIамгу буккаванссар тIисса. Ряхра шинал хьхьичI лавгсса чIумалгу зия бувну лявкъуну, цIу буккан бувссия, — хъиннува хъювусул буклай бур Любовь Александровна.

Учинсса махъ бакъа ливчIунна. Ттун хъинну нач хьунни ттула шяраваллил агьлу чIалачIин дакъа ххирасса оьрус хъамитайпалул хьхьичI. ЯхI гъавгъунни.
Гъазибаглухсса ччаврил Любовь Александровнан, ласнал ляхъиндалуцIун, щалла шяравалу, шяраваллил агьлу, Лакку билаятрал аьрщи-ххюлва ххирассия, ттигу ххирассар.
Шагьрулий хъунма хьусса душнин, кьянатсса зунттавусса багьу-бизугу кьамул хьуну, зунттал аьдат­ругу лархьхьуну, хIурматрай дуручлай бивкIссар, ттигу буссар. «Шяравун бувкIсса чIумал, лачак дакъа кьатIу-шав къабувкссар», — тIий дакIнийн бутлан бикIай ванил ласнал ляхъин.

[dropcap]Т[/dropcap]тунма ва дакIний ливчIуна, цила арснал мукьцIал лахъаннингу, муния махъгу, шяравун бувкIтари, гьарца нюжмаркьини, лухIисса лачакраву, цала къатрал къапулул хьхьичI бавцIуну, ххуллийх наниминнайх ссайгъат бачIлай.
Ласнал нину-ппу сагъну бу­ни, шинай кIийлва-шамийлва бучIайссия ва Хъусрахьхьун. Вайннал чIахху-чIарахми ттигу дакIнийн бутлан бикIай, махIаттал шайссияв, Жарият (ласнал нину) лакку мазрай, Люба оьрус мазрай цаннищал ца гъалгъа тIий бунува, гай цаннин ца бувчIайва тIий.
Буклай байбивхьуния шихунмай хIакьинусса кьининин чичайссар ванил «Илчи» кказитгу. Ласнал гъан-маччассанная, цала кIулминнаясса макьалартту дусса кказитругу ябуллай буссар.

Ттула шяраваллил агьлу ваксса ххирасса хъамитайпалул дакIнийн щунсса тIул лялиян дан къахъанай, Зумаритавал байрандалийн лавгсса чIумал, бивра Щамххаллул щаращуйн, буккав алхIамгу. ДакIнийн дагьунни жула хъин­сса аьдатгу. Гьарца шинал махъра-махъсса занг рирщуну махъ школа къуртал буллалими лагай­ссияв Щам­ххаллул щаращуйн. МарцI байссия цуппа щаращигу, лагма-ялттусса кIанттурдугу. Ттун къакIулли та кьариртссарив хъу­сращиял ва аьдат­гу, щил дурссарив ва мурдал­сса тIулгу, жуламиннал дурссарив, ххуллийх нанисса щилчIавссаннал дурссарив. Щил дарчагу, лап кьадарсса, кьюркьусса тIул дурну дур.

БакI-чурххал исвагьисса бу­шивруцIун, дакI хъинсса, аьмал марцIсса Люба хъусращиянгу хъи­нну ххирассар, бусравссар.
Щалагу шяраваллил агьулданул цIания багъишла бити тIий бура Любовь Александровнахь ва иширал ялув. Хъунмасса умудгу, вихшалагу дур Хъусращиял жагьилтурал, циняв цачIун хьуну, кIа щаращи бакьин банссар тIисса. Любовь Александровна цуппа дакIний бур, сентябрь зуруй арснащал бувкIун, цал ттигу щаращи цIу буккан бан. Амма умуд бур ва даву, тай бучIаннин къадиртун, жяматрал цала дуванссар ва вания тихунмайгу укунсса иш тикрал хьун къабитанссар тIисса.