«Ястреб» тIисса СОБР-данул спортзалдануву хьунни Дагъусттаннал Росгвардиялул управлениялул зузалтрал дянивсса данди буккаврил чемпионат. Бяст-ччалливу гьуртту хьунни аьмну 40 спортсмен.
Андриана Аьбдуллаева
Турнирданул хIасиллайн бувну, командарттаву 1-сса кIану бувгьунни МахIачкъалаливсса ОМОН-лул командалул, кIилчинмур – «Ястреб» тIисса СОБР-нул командалул, шамилчинмур – Каспийскалийсса ОМОН-лул командалул. «За волю к победе» номинациялий бахшишру ларсунни МахIачкъалаливсса ОМОН-лул кIия зузалал.
[dropcap]Р[/dropcap]осгвардиялул управлениялул хъунама, генерал-майор МахIаммад Баачиловлул буллунни хьхьичIунсса кIанттурду бувгьуминнан кубокру, медаллу ва грамотартту. Мунал бувсунни, гьану бивзния шихунмай цала подразделенияртту личIи-личIисса бяст-ччаллаву гьуртту хьуну, цимилагу хьхьичIунсса кIанттурду бувгьушиву, цIана цанма федерал даражалийсса бяст-ччаллаву чялишну гьуртту хъанансса пикри бушиву, цала зузалт ми бяст-ччаллавугу хьхьичIунсса кIанттурду бугьансса, республикалул цIа лайкьну дуруччинсса даражалул бушиву. ХьхьичIунсса кIанттурду бувгьуми барчагу бувну, барчаллагь баян бунни вай спортсментал хIадур бувсса кьюкьрал командиртуран.
Росгвардиялул управлениялул физподготовкалул ва спортрал хъунама, полициялул майор Султан Мусаевлул бувсунни чемпионатрай ххув хьуминнаяту Управлениялул цачIусса команда сакин дантIишиву ва му Ухссавнил Ккавкказуллал округрал чемпионатрай гьуртту хьунтIишиву.
