Утти паспортру МФЦ-лийхчIин ласун шайссар

[dropcap]А[/dropcap]гьалинахьхьун паспортру булун цува увкIун ия ДР-лул виваллил иширттал министр Аьвдурашид МахIаммадов. Мунащал ия Миграциялул управлениялул хъунама МахIаммад МахIаммадов. Шикку гьуртту хьунни мукуна Дагъусттаннал экономикалул министр ХIусман ХIасбулатовгу.

Уттинин агьалинал МФЦ-лийн буллай бивкIссар Аьрасатнал паспорт ласунсса ягу баххана бансса аьрза, цуппа паспортрив ласайсса бивкIссар МВД-лул подразделениялий. Уттирив паспортругу шиккува буллалиссар. Му масъала щаллу буллалиссар, хьхьичIва кунма, ацIва гьантлул дянив.
МФЦ-дал цала бигарду гьарза шаврицIун дархIусса хIадуршинна дуллай дачIи шин хьуну дур. Аьра­сатнал ХIукуматрал хIукмулийн бувну, МФЦ-дай паспортру ва водительтурал удостоверенияртту ябансса хасъсса къатри дурну дур.

[dropcap]В[/dropcap]а кьини паспортру ласун увкIсса 9-гу инсаннахьхьун паспортру буллуну махъ, цинярдагу зивурдайх бувккун, Аьвдурашид МахIаммадовлул ва Миграциялул къуллугърал зузалтрал ххал дунни МФЦ-лул къатри. Министрнал бувсунни, агьалинан бигьашиву даву мурадрай, цала бюхъайссаксса чIяруну ишла дуллантIишиву МФЦ-дал каши, уттиния тихуннай цинярдагуМВД-лул дуллай диркIсса хIаллихшиннарду МФЦ-дал подразделениярттайхчIин дан хIарачат бантIишиву, ччясса чIумул мутталий МФЦ-дайхчIин чил билаятирттал паспортру ласавугу нирхиравун дутантIишиву.

МВД-лул ва МФЦ-лул цачIу­сса даврил мурад агьалинан паччахIлугърал хIаллихшиннарду давриву бигьа-рахIатшиву шаву бур. Цаппара гьантрава агьалинаща хIадурсса паспортру ласлан бюхъантIий бур МФЦ-лул мукьва филиалданий, ссуттилнин му даву щалагу республикалийсса МФЦ-дал дуллантIий бур.

Андриана Аьбдуллаева