Мугьлат бакъа халкь щинал щаллу бувара!

[dropcap]Л[/dropcap]аргсса нюжмардий МахIачкъалаллал бакIчинал кIанай чIумуйну зузисса Абусупиян ХIасановлул каялувшиндаралу «Махачкалаводоканал» ОАО-лул ва «МарцIсса щин» тIисса ГУП-рал вакилталгу гьурттусса хъуннасса батIаву хьунни. Ваний мукунма гьуртту хьунни Дагъусттаннал централ округрал хъунама Аьбидин Къарчигъаев, ДР-лул Роспотребнадзорданул санитар надзорданул отделданул хъунмур Ирина Кьурбанова ва хъуншагьрулул къуллугъирттал пишакартал.


З. АьбдурахIманова
[dropcap]Б[/dropcap]атIаврил хъунмур сававгу щин дакъар, щинал аварашиву дур тIисса шагьрулул халкьунная телефоннайнсса хIат-хIисав дакъасса оьвчавуртту хьуну дур.
БатIаву тIитIлай, Абусупиян ХIасановлул кIицI бувунни, «Махачкалаводоканал» буржлувшиву халкь щинал щаллу бан. Ванал хъуннасса аьй-бюв­кьу дурунни коммунал къуллу­гъирттал пишакартурай ва амру бувунни мугьлат бакъа ва иширал бази бан.

Диспетчертурал къуллугърал хъунама Телман Сулаймановлул бувсунни, бургъурдаву щинал гуж чан хьувкун, щин гьаз къа­хъанай душиву лахъми зивурдай яхъанахъисса халкьунначIан. Щинал хъуннасса мюхтажшиву дусса дур Хушетрай ва Ватан микрорайондалий. Мукунма ванал кIицI бувунни цаппара лахъ къатрал застройщиктал сававнугу шагьрулий щинал ма­съала къаххуйсса даражалий бушиву. Мисалдаран, щинаххуллий цIуну бувсса къатта сававну шанма гьантлий халкь щин дакъа ливчIун бур.

Шагьрулул бакIчинал хъиривчу АьвдурахIман МахIмудовлул бусаврийну, къатта буллай су­кку хьусса заллухъруннахьхьун инженер инфраструктуралиягу цIухху-бусу къабувну, «Махачкалаводоканалданул» дулайсса дур «технические условия».
— Халкьуннал цала жипава­сса арцух машан ласлай бур зуща щин. Тавакъюри халкь марцIсса хIачIай щинал щаллу буваву. Тавакъюри мукунма зула бух хьу­сса щинал бургъурдугу баххана баву, цанчирча ми бияйнин бив­сса, ккутIа-вярчIари хьусса буну тIий, зул щин халкьунначIан дияннинна тIайланна канализациялувун най дуну тIий. Дувара низам мугьлат бакъа! — увкунни мэрнал хъиривчунал.

Коммунал къуллугъирттал пишакартуралгу шикку кIицI бувунни цала даву низамрай дуван къабюхълахъишиву цаппара дайшишру сававну. Мисалдаран, вайннал тIалав бувунни шагьрулул каялувшиндарая мойкардал ва коммерциялул объектирдал ялув кьянкьану бацIан. Ирина Кьурбановал бусаврийну, вайннал дурсса хъиривлаявурттал ккаккан бувну бур жула хъуншагьрулул халкьуннал ишла дувайсса щин 88,6 процентрал оьлуркъусса, ци-дунугу хIаласса душиву.
Абусупиян ХIасановлул батIаврил ахирданий бувсунни коммунал къуллугъирттал биччибакъашиву сававну халкь азурда буллалаврил хIакъираву низам дуруччай къуллугъирттайнсса материал датIлай сукку хьунтIишиву.