[dropcap]Д[/dropcap]агъусттаннал парламентрал вице-спикер, Дагъусттаннал региондалийсса «Справедливая Россия» партиялул отделениялул председатель Камил Давдиевлул соцсетирдайсса цалла лажиндарай баян буллай ур «Мой Дагестан» тIисса республикалул каялувчитурал кадрарду хIасул буллалисса конкурсраву гьуртту хьияра тIий.
Имара Саидова
Ванал кIицI лаглай ур, махъсса ппурттуву Дагъусттаннай хъин чулиннайсса тамансса дахханашивуртту хъанай душиву. ДР-лул БакIчи Владимир Васильевлул сипталийну баян бувну бур «Мой Дагестан» тIисса конкурс. Конкурсрал мурад – итххявхсса, хьхьичIунсса каялувчитал личIи баву ва республика тIутIайх дичин дансса каялувчитурал команда цIу дуккан даву.
— Дагъусттаннай ва республикалул кьатIув ялапар хъанахъисса, тIайламур бацIан бан, цала хияллу дузрайн буккан бан, Дагъусттаннал бучIантIимур къулай бан ччисса инсантуран ва буниялагу ххаллилсса чаран хъанай бур. Цума-цагу инсаннал ва сант итадакьин къааьркинссар. ХIакьину Дагъусттан мюхтажну бур куртIсса кIулшивуртту, зун гъира-шавкь дусса, цIу-цIусса пикрирду бусса, агьалинал оьрмурду ххуй чулийнмай баххан бан ччисса пишакартурах.
«Зухь ва цIанасса ххуллух республика даххана дансса, зула оьрчIал ва оьрчIал оьрчIал бучIантIимур ххуй бансса ва агьалинал вихшала лайкь дансса хъуннасса каши дуссар. Дагъусттан мякьну бур даврил опыт бусса профессионалтурах.
ХIурмат бусса дагъусттанлувтал! ХIала буххияра каялувчитурал командалул давривух», — тIий ур Камил Давдиев.
«Мой Дагестан» тIисса конкурсраву гьуртту хьун ччиминнал аьрзри кьамул буллалиссар июль зурул 12-нния 29-ннийн бияннин. Конкурсрал финал хьунтIиссар август зурул 27-30-нний.
