[dropcap]А[/dropcap]ьрасатнал Президентнал СКФО-лийсса вакил Александр Матовниковлул ва ДР-лул БакIчинал кIанайма Владимир Васильевлул дунни ДР-лул Дагъусттаннал социал-экономикалул масъаларттал хIакъиравусса батIаву. Миннал жавабру дуллунни журналистътурал суаллахьхьунгу.
Журналистнал буллунни ПаччахIлугърал каялувчинал «майрал» хIукмурду бартбигьаврил лагрулий ДР-лий цукунсса давуртту дуллан най буссар тIисса суал. Мунихьхьун жаваб дуллай, Александр Матовниковлул увкунни:
2018 шинал майрал 7-нний кьамул бувсса хIукму – му жула билаят хьхьичIунмай шаврил стратегиялул планни. Му хIукмулул мурад хъанахъиссар цIуллушиву дуруччаврил, дуккаврил, демографиялул, ишбажаранчишиврул, цифрардал экономикалул ва цаймигу ххуллурдайсса национал проектру.
Ухссавнил Ккавкказуллал яла хъунмур субъект душиву хIисавравун лавсун, Дагъусттаннан агьамссаннун ккаллину дур Каспийрал транспортрал инфраструктура, шяраваллил хозяйство лядуккан даву, инсаннал каширду гьарза даву (развитие человеческого потенциала). Цанчирча Дагъусттаннай агьали гьарзанугу бур, захIмат бан ччиссагу бур.
Мунал бувсунни дуккаврил иширттах къулагъас ххи дуллантIишиву. Ттинияр тихуннайгу лахъи лаган дуллантIий бур зузалтрал луртан дузал даврил давурттугу. Дачин дуллантIиссар жула паччахIлугърал законну цинявннан цасса хьун даврил ххуллийсса давуртту, низам дишинтIиссар циняв кIанттурдаву.
Журналистътурал суаллу Владимир Васильевлухьхьун буллунни региондалий бизнес «ххютула» дуккан даврил ххуллий ихтиярду дуруччай органнал дуллалисса давурттал хIакъираву. Миннухьхьун жаваб дуллай, республикалул каялувчинал бусаврийну, цIана жува зий буру давурттал хIасиллу хьун даврил цIаний. ХIасиллугу хъанахъиссар тIайлану зий бушиву ва оьрму ххуй хъанай бушиву инсантуран аьлтта чIалачIаву. ЦIанасса ппурттуву ка щяхсса къуллугъчитал давурттацIа буллай, танмихIрайн кIункIу буллай бур. Му даву ттиния тихуннайгу дуллантIиссар, коррупциялул ишру бухлаган банцIа, тагьар хъин чулиннай даххана хьуннин.
— Зунгу хIисав хьухьунссар, шиккун на къаувкIссарача, Аьрасатри Дагъусттаннайн бувкIсса, мунил яла ххуйми вакилтал, хъинми практиктал зунтIиссар шикку, зий байгу-бивхьунни. Зуща бюхълай бур мунил хIакъираву тIайлану чичлан ва буслан, — увкунни Владимир Васильевлул.
Республикалул каялувчинал бувсунни зузалт къуллугъирттай битаврил кьяйда-кьанумраягу. Ахирданийгу мунал бувсунни «Ттул Дагъусттан» тIисса конкурсрай гьуртту хьун аьркиншиву гьунар ххими, язи-язими, Дагъусттан ва мунил цIа марцIну ядан ччими.
