[dropcap]В[/dropcap]аччиял шяравасса Увайсхъал агьлу-авлад чIявучин кIулсса бур. Му тухумраясса ХIусайн ва Залихха Увайсовхъал тай захIматсса дяъвилул шиннардий хъуни бувну бур арулва оьрчI.

Имара Саидова
ДакIнийн бутлай ур арс Шяпи:
— Жул ппу ХIусайн, Буттал кIанттул цIанийсса дяъви къуртал хьуну махъгу, Японнащал­сса дяъвилий взводрал командирну ивкIссар. Зана хьуссар дяъвилия 1946 шинал. Нину Залихха, дяхтта колхозрай, хьхьувай аьралитуран янна дуруххайсса артелданий зий, чIявусса захIмат бивхьусса инсанни. ДакIния къабуккай ряхра шинавусса жул хъунмур ссу, кIарттуву цIу дихьлай бунува, гьухъуцIух цIу ларчIун, ххассал бан къавхьусса, чIивимур ссугу, къашай хьуну, бивкIусса якьамасса чIунну. Нитти-буттал жу мюрщину бунува сайки хъуниминналуксса захIмат буллай аьдат бувссару.

Шяпи увсса 1947 шингу туну, бигьасса ча дикIанссия, къадиркIун дур. ЧIяйннал дянивмур даражалул школагу къуртал бувну, дуклан гьан гъирарайсса жагьилнан, ичIаллил тагьар захIматсса душиврийн бувну, нитти-буттан кумаг буллай, шава ацIан багьну бур. 1966 шинал ва увцуну ур аьралуннаву къуллугъ буллан. Лажин кIялану буржгу лавхъун, зана хьуну махъ Шяпи увххун ур М. ХIажиевлул цIанийсса заводрайн токарнал ученикну. Жагьил­сса пишакарнал цалчинсса гьантрайва ккаккан бувну бур цала бюхъу ва гьунар. Тания шихунмай­сса Шяпинал щала оьрму бавхIуну бур му заводрацIун.

Цалчинмур сменалий 19-мур цехрал станокрахгу зий, дуклан увххун ур заводрачIасса 3-мур ГПТУ-лувун. Му ванал къуртал бувну бур марцIсса ххювардай. Давриву хьхьичIунсса ккаккияртту чIалачIи даврихлу 1971 шинал лайкь хьуну ур хIурматрал грамоталун.
— 1971 шинал ххюя хьхьичIунсса пишакарная сакин бувсса делегациялувух Мурманскаллал областьрайсса мува МахIаммад ХIажиевлул цIанийсса плавбаза цIубуккан буллалисса давурттайн нава уцаву на ттунма хьусса хъунмасса тIайлабацIулун ккалли бара, — тIий ур Шяпи.

Ванал гьунаргу так цалла дав­рицIун бавхIусса бивкIун ба­къар:
17 шинал стаж бур ванал альпинизмалул ва спортрал личIи-личIисса бяст-ччаллаву гьурттушинна даврил; цимилгу цалчин­сса кIанттурду бувгьуну бур атлетикалул ва волейболданул турнирдай. 1973-ку шинал январь зуруй Веденолий ва Бущихъив марххалттал лахIунттахьхьун биривсса агьали ххассал буллалисса давурттай бивхьусса захIматрахлу дуллуну дур ХIурматрал грамота. 1979 шинал хьхьичIунсса жагьилсса пишакар лайкь хьуну ур СССР-данул ЦК ВЛКСМ-рал значокран.

Магьирсса пишакар хIисаврай Шяпи заводрал администрациялул чулуха тIайла увккун ур Ленинградуллал жамирду бай институтравун буххан хIадур байсса курсирдайн. Ми курсругу марцIсса ххювардай къуртал бувну, увххун ур ДГТИ-лувун. Институтравугу Шяпи ца яла хьхьичIунма студент ивкIун ур. Ва мудангу лагайсса ивкIссар тани жагьилтурал дянив сийлий диркIсса студентътурал стройотрядирттавух зун. Институт къуртал бувну махъ Шяпи кьамул увну ур 11-мур цехрал инженер-технологну, хъун хIал къавхьуну ивтун ур 8-мур цехрал хъунаману.
Ванал каялувшиндаралу ккузнилул цехраву тай шиннардий зий бивкIссар 150-нния ливчусса зузалт. ХIакьинусса кьини зий ур 27 инсан.

— Билаятрайн захIматсса чIунну дуркIсса, чIяруми предприятияртту , заводру лавкьусса заманнай, Аьвдулбасир Папалашевлул хIарачатрайну, ххаллилсса пишакарталгу цачIун бувну, хIакьинусса кьинигу заводрал даву дацIан къадиртссар. Ттула хъунмур оьрму заводрай зий лагавриягу на тачIав хIайп къаувкуссар. Ва коллективралли ттуяту захIмат ххира­сса, инсаншиву ва ссавур дусса инсан увсса. Оьрмулул мяънагу инсаннал дурсса мюнпатсса давурттавур дусса, — тIий ур Шяпи цанна дакIнихтуну ххира хьусса даврия.
Вай гьантрай дур Шяпи ХIу­сайнович увсса кьинигу. Мугу барча дуллай, чIа тIий буру Шяпинан цIуллушиву, нахIу-хIалимшиву!