ЛяличIисса кIиришиврул сукку бувну…

[dropcap]И[/dropcap]юльданул 4-нний ДР-лул БакIчинал кIанайма Владимир Васильевлул дунни районнал ва шагьрурдал бакIчитуращалсса видеоконференциялул журалийсса батIаву. 

Региондалул каялувчинал бувсунни республикалий махъсса нюжмардай ляличIисса кIиришиву дагьну душиву. МуницIун чан хьуну дур хIачIай щингу. Мунияту властьрал бартбигьин аьркин­ссар цайвасса бурж, муниципалитетирттайнгу, хъунилсриннайнгу, жяматирттайнгу чул бивщуну.

Владимир Васильевлул бувсунни хIачIай щин диялну дакъашиврул масъала щаллу бан цахъисгу захIмат хьуну бушиву кIиришиву дагьаврицIун бавхIуну. Мунийн бувну аьркинну бур хьхьу-кьини къакуну му масъалалулсса буллан.
Чани чIявуну лещан буллалаврил хIакъираву Дагъусттаннал БакIчинал кIанайманал увкунни:
«Электросетирдал захIматсса тагьарданул ва мунийну къатравун ток чан хьуну бушиврул масъала жула республикалий уттигу дузрайн буккан бувну бакъар.

Жува муниха зунтIиссару ва зурул 20-нния тинмай. «Россети» ПАО-рал жучIанма гьан буллай бур кумагран 2000-я ливчусса электриктал, 700 техника, машинартту, миннал дацIан дантIиссар токрал 9 азарда ттарцI, 17 азарда учетрал прибор, дахIинтIиссар 600 километра токрал ххаллал, 6 муниципал сакиншиндарай дишинтIиссар дагьай­сса низам – МахIачкъалалив, Буйнакскалий, Буйнакс­каллал, Къарабудахкъантуллал, Къумтуркъалаллал ва Серго­къалаллал районнай. Ми давуртту бартдигьиншиврул «Россети» ПАО-рал харж дан тIий дур 1 млрд. ва 300 млн. къуруш. Ми давуртту дурну махъ ми районнай ва кIивагу шагьрулий токрал щаллу баврил масъала дузрайн буккантIиссар, яла зунну лирчIми районнайгу», — увкунни Владимир Васильевлул.
Яла Дагъусттаннал БакIчинал кIа­найманал бувсунни ДР-лул ХIу­куматрал Председательнал 1-ма хъиривчу Рамазан Аьлиев къуллугърая укьан аврил хIакъираву.