[dropcap]А[/dropcap]прельданул 23-нний ДР-лул БакIчинал кIанайма Владимир ВасильевлучIа хьунни гьарца нюжмардий шайсса батIаву. Микку гьуртту хьунни ДР-лул Халкьуннал Мажлисрал председатель Хизри Шихсаидов, паччахIлугърал властьрал органнал ва МахIачкъалаллал администрациялул каялувчитал.

---

Ххал бивгьунни 2018 шинал апрель-майрай Дагъусттаннай хьунтIисса лачIун буккаврил Европанал чемпионатрал ва 1-мур ва 9-мур майрал байранну даврил хIакъиравусса масъалар­тту. ДР-лул ХIукуматрал председательнал 1-ма хъиривчу Анатолий Карибовлул бусаврийн бувну, Европанал чемпионат­райн хIадур шаву цила кьяйдалий най дур. Бяст-ччаллайн бучIантIисса хъамал кьамул бав­рицIун бавхIусса циняв масъалартту дузал хьуну бур, къулайсса шартIру дузал дурну дур спортсментурангу, миннал тренертурангу, судиятурангу, мукунна тамашачитурангу.

Владимир Васильевлул кIицI бувсса куццуй, циняв масъалартту бартбивгьуну бикIан аьркинссар яла лаваймур даражалий, хъамаллуращал зумабахълан аьркинссар хIурматрай, хIалимну.

Анатолий Карибовлул бувсунни интнил ва захIматрал байран даврил программа цукунсса дикIантIиссарив: га кьини агьали сайрданий буккантIий бур, хIадур дурну дур культуралул ва бяла­хъаврил программа, дуллантIий дур фестиваллу, концертру. Майрал 9-нний МахIачкъалалив дантIий дур митингру, шадлугърал парад, тIутIив дишаву. Га кьини дагъус­ттанлувтал гьуртту хьунтIий бур «БивкIу бакъасса полк» тIисса щалвагу Аьрасатнал акциялувух.

МуницIун бавхIуну Дагъусттаннал БакIчинал кIанайманал кка­ккан бунни республикалул циняв шагьрурдай ва районнай дан аьркинну душиву байрандалул гьант­рай мюхчаншиврул ххуллийсса профилактикалул давурттугу.
ХIадур бувссар
ХI. Аьдиловлул