[dropcap]А[/dropcap]прельданул 23-нний Дусшиврул къатраву КТО-лул чIумал (2016 шинал июньдалул 17-нний) ливтIусса Росгвардиялул управлениялул ОМОН-далуву куллугъ буллай бивкIминнал гъан-маччассаннан наградартту дуллунни.
КТО хьуссар Табасараннал райондалул Ерсей тIисса шяравалличIату арх бакъа. Наградартту дулаврий гьуртту хьунни ДР-лул БакIчинал кIанайма Владимир Васильев, АьФ-лул национал гвардиялул аьралуннал бакIчи генерал-полковник Сергей Меликов, АьФ-лул Ухссавнил Ккавкказуллал округрайсса национал гвардиялул аьралуннал бакIчи генерал-лейтенант Сергей Корнюшкин, АьФ-лул Президентнал Ухссавнил Ккавкказрайсса вакилнал хъиривчу Валерий Попков ва цаймигу.
Микку махъ лахълай, Владимир Васильевлул увкунни: «Цуксса хIайпнугу, жуятува лаглай бур яла ххуйми. Ми бур адав-имандалулгу, чувшиврулгу, лайкьшиврулгу чулуха эбрат ласунсса инсантал, Дагъусттан ва Аьрасат минная пахрулий бур. Узданшиву, ас-намус, къирият – ми хъанахъиссар дагъусттанлувтуралгу, циняв аьрасатлувтуралгу хасиятрал гьануну».
Валерий Попковлул СКФО-райсса вакил Олег Беловенцевлул цIанияту барчаллагь увкунни циняв ихтиярду дуруччай органнал вакилтурахь, агьалинал мюхчаншиву дуручлай бушиврухлу.
«На барчаллагь тIий ура Дагъусттаннай паракьатшиву ва узданшиву дуруччаврил цIаний цалла жанну кьурван дурсса жагьилтурал нитти-буттахь», — увкунни В. Попковлул.
Сергей Меликовлул бусаврийн бувну, вирттаврал ккаккан дурсса чувшиву хъамакъаритаву ва миннахь барчаллагь учаву – жулва цинявннал буржри.
Чувшиврул орденну дуллунни полициялул хъунама прапорщик Султан Абакаровлул щащар Лейла Абакарован, полициялул хъунама сержант ХIалалмахIаммад Кьурбановлул нину Зайнаб ТIагьирован, полициялул хъунама сержант ТIагьир Хасбулатовлул щащар Зульфия Хасбулатован ва полициялул прапорщик Бийсултан Хайбуллаевлул уссу Темирбулат Хайбуллаевлун.
«За боевое содружество» тIисса медаль дуллунни ДР-лул виваллил иширттал министр, полициялул генерал-лейтенант Аьвдурашид МахIаммадовлун.
