ХIурмат бусса лакрал жямат! Ххирасса «Илчи» кказитрал буккулт! Ларгунни жуятура ца шин ттигу. Къабигьасса шин дия. Билаятрайсса политикалул ва экономикалул тагьардануцIун дархIусса захIматшивуртту асар хьунни жунна цинявннан. ЧIявусса инсантал давуртту дакъа ливчIунни, зузиминнангу харжирдал ссуссукьушиву хьунни.
Гарица шинах кунна, ларгсса шинал ахирданий ЦIуссалакрал райондалий хьунни марцIну ххювардай дуклакисса оьрчIру лахъа-хъун буллалисса мажлис. Декабрь зурул 29-нний ЦIуминалийсса ЦIуссачIурттащиял школалий 150-нния ливчусса дуклаки оьрчIан райондалул БакIчи ХIажи Айдиевлул дунни дакIний личIансса бахшишруь.
2008 шинал Пекиннай хьусса Олимпий тIуркIурдал чемпион Ширвани Мурадов январьданул 8-нний цалчин гьуртту хьунни Дагъусттаннал любительтурал футболданул лигалувух.
Январьданул каникуллал гьантрай, зурул 3-7-нний МахIачкъала шагьрулул шахматирттал школалий хьунни Дагъусттаннал хъуншагьрулул школардай дуклаки оьрчIал дянивсса шахматирттай буккаврил первенство.
Фондрал даврил ххуллурдавасса цану ккаклай бур ихIсандалул даву. Му ххуллий уттинин дунни тамансса акцияртту. Миннува аьдатравун дагьсса дур Зумаритавал ва Кьурбан байраннан хас дурми. Миннул ялун ххи хъанай бур цIу-цIуссагу.
Жула хIукуматрал чIяруми регионнай бур гриппрал эпидемия. ЧIявусса школарду лавкьунни. Оьрмулул бугьарами гриппрал къашавай шайсса бур шинай кIийлавагу, оьрчIру тIурча – 12-ла. Гриппрал дарурттай фармкомпаниярттал миллиардру арцул лякъайсса бур. Цинявннан кIулли яла хъинмур къашай хьун къаацIаву душиву.
Давудлул арс Аьзиев Мурад Хархавар бакъасса бивкIулул кьадар бувкIунни 9-мур январьданий Аьзиевхъал ужагърайн. Къашавай усса баяннин дунияллия лавгунни ххаллилсса зунтталчу, лак ххирасса лаккучу, авцIусса кIану чIюлу байсса дугърисса чув-адамина, бусравсса Аьзиевхъал тухумрал сий хъиннура хъунна дуллалисса вакил Давудлул арс Аьзиев Мурад.
