Фондрал даврил ххуллурдавасса цану ккаклай бур ихIсандалул даву. Му ххуллий уттинин дунни тамансса акцияртту. Миннува аьдатравун дагьсса дур Зумаритавал ва Кьурбан байраннан хас дурми. Миннул ялун ххи хъанай бур цIу-цIуссагу.
Вана ЦIусса шин дайдишин хьхьичI гьантрайгу «Гъази-Гъумучи» фондрал Лакрал райондалул администрациялущал ва больницалул зузалтращал цачIуну дунни ятинсса ва нитти-буттал аякьалулу ба­къасса оьрчIансса чирилул акция. Фондрал хъунама, райондалул больницалул хъунама хIакин АьбдурахIим Дибиров ва райондалул администрациялул бакIчинал цалчинма хъиривчу Абакар Къюннуев хьхьичIну больницалул хIакинтал ва фонд­рал волонтертал лавгунни ятинсса, нитти-буттал аякьалулу бакъасса ва захIматсса тагьардануву ливчIсса оьрчIру ялапар хъанахъисса кулпатирттавун хъуни-хъунисса ссайгъатирттащал. Акция цуппагу хъинну хIадур бувну бия. Зурул лажиндарай фондрал волонтертурал ва больницалул хIакинтурал ялун личин бувну, сияхIрайн лавсунни мукунсса оьрчIру. Машан ларсунни гьарца оьрчIан дакьин­сса кIинттулсса янна-ус (гъили­сса свитерду, хIажакру, кьяпри, курткарду). ЦIушинавун ххари унни аьмну 22 оьрчI.
Янна-ус ва ахъулсса дачIав­рищал оьрчIан бунни медициналул кумаг, кIул хьунни ми оьрчIру ялапар хъанахъисса кулпатирттал буруккинттащал. Ххал диргьунни ми кулпатирттащал гихуннай дансса давуртту.
Ятинсса ва нитти-буттал аякьалулу бакъасса оьрчIру тарбия буллалисса кулпатру барчаллагьрай ва дуаьрттай бия ссай­гъатру лавсун бувкIминнайн.
Ва акциялул чIалачIи бунни оьрчIахсса аякьалул, так цанна оьрчIан дакъасса, щалла обществалунна цуксса хъуннасса агьамшиву дуссарив. Цанчирча хъинсса давурттал оьрчIал дакIурдиву хъиншиврул гьанна бугьайну тIий.