Гарица шинах кунна, ларгсса шинал ахирданий ЦIуссалакрал райондалий хьунни марцIну ххювардай дуклакисса оьрчIру лахъа-хъун буллалисса мажлис. Декабрь зурул 29-нний ЦIуминалийсса ЦIуссачIурттащиял школалий 150-нния ливчу­сса дуклаки оьрчIан райондалул БакIчи ХIажи Айдиевлул дунни дакIний личIансса бахшишруь.

А.Аьбдуллаева

Аьдатравун багьсса куццуй, райондалул БакIчинал чулухасса грамотартту ва бахшишру дай­ссар райондалийсса цинявппагу школардай марцIну ххювардай дуклакисса оьрчIан, мюрщи классирттал оьрчIая байбивхьуну.
Ххуйну дуклакими барча буллай, ихтилат бунни ХIажи Айдиевлул.
Цала ихтилатраву ванал кIицI лавгунни ххуйну дуклакими барчагу бувну, миннан бахшишру даву ххаллилсса аьдат хьушиву, дуккаврил сий мудангу диркIшиву ва дикIантIишиву, ци захIматсса чIунну дучIарчагу, дуккавриву итххявхминнах къулагъас дикIантIишиву.
— Дуккавриву итххявхсса оьрчIру жула бучIантIимурди. Вайннал бюхттул дантIиссар райондалулгу, республикалулгу цIа-кьини, — увкунни ванал.
Ххуйну дуклакими барча бан мукуна увкIун ия ЦIуссалакрал райондалул чулухасса ДР-лул Халкьуннал Мажлисрал депутат Амирхан Амирханов. Махъсса шиннардий аьдатравун дагьсса ва кьини оьрчIалгу, нитти-буттал ва учительтуралгу байрандалийн кIурадавунни. Ва кьини цала оьрчIал чIарав бацIан, миннал ххаришиву кIидачIин бувкIун бия нину-ппу, учительтал, гъан-маччами. ОьрчIан бахшишру дурну махъ цинявппа тяхъа буккан бувсса хIазсса дялахъру хьунни.