ХIурмат бусса лакрал жямат! Ххирасса «Илчи» кказитрал буккулт! Ларгунни
жуятура ца шин ттигу. Къабигьасса шин дия. Билаятрайсса политикалул ва экономикалул тагьардануцIун дархIусса 
захIматшивуртту асар хьунни жунна цинявннан. ЧIявусса инсантал давуртту дакъа ливчIунни, зузиминнангу харжирдал ссуссукьушиву хьунни.
Лариса ХIажиева,
Дагъусттаннал халкьуннал артистка
ЦаичIанс зурул, ца нюжмардул, гьантта-кьинилул дянивгума шай инсаннал оьрмулуву дакIний лса ишру: ххариссагу, пашманссагу. Шинал лажиндарай ттул оьрмулувугу хьунни личIи-личIисса ишру.
Миннуя гьармуния гъалгъа тIун къаччива. Амма яла дакIний личIанмур, яла ххаримур иширая ттула ххирасса миллатрал агьулданухь, кказитрал буккултрахь къабувсун битан къахьунссар. Цумурцагу хъамитайпалун, ниттин лякьлул оьрчIаяр ххирасса цичIар къадикIайхьунссар, миннал тIайлабацIулия, талихI-тирхханнарая кунма ми ссаячIав ххари къашайхьунссар. Ларгсса шин му чулуха ттунна тIайлабацIу бусса дия учин бюхъанссар. Ттул аьзизсса арс МахIамма, школагу къуртал бувну, хъуннасса конкурсгу дурхIуну, увххунни дунияллул ВУЗ-ирдаву ца яла хьхьичIунмур, ва сий думур ВУЗ-равун – Репиннул цIанийсса Санкт-Петербургуллал художествалул академиялувун, архитектуралул факультетрайн. Умуд бур ххуйсса кьиматирттай академиягу къуртал бувну, дипломгу лавсун ххари банссара нава арснал тIисса. Ин ша Аллагь.
ЦIусса шин барча тIий, ттунма хъунмасса пахру бусса ва дазу-зума дакъа ххирасса ттула миллатран чIа тIий бура цIуллушиву, буллугъшиву, барачат. ЦIусса шинал гьарица ужагъравун чIярусса ххаришивуртту духханнав, цинявннал дакIнийсса мурадру-хияллу бартлаганнав.
Гьаз хьунни дуки-хIачIиялул, лаххи-ликкиялул багьри.
Шинал лажиндарай хьунадаркьусса захIматшивурттугу дурхIуну, ххари-ххуймунийнсса хьул-умудирттащал бавцIуну буру ЦIусса шинал бухкIуллий. Умуд бур ЦIусса шин ларгмурнияр ххарисса, ххуйсса, барачатсса хьунссар тIисса. Я Аллагь, дяъвирдал ахир хьуннав, дунияллийн паракьатшиву ликканнав. Дарусса ссавния, бивтсса бургъия неъмат ласун итаннав гьарица инсан.
Андриана Аьбдуллаева
Сяид Сулайманов,
Ккуллал райондалул муниципал сакиншиндарал бакIчи
Жула ялату ларгсса шинал биттур буван ччай бивкIми затру дакIнийн бичлачисса чIумал, чIалан бивкIунни бювхъушиву гай чIявуми бартбигьин. Гьай-гьай, кьюлтIсса зат бакъар, ца жула Лакрал билаятрай бакъагу, канихьхьун дучIайсса арцу щала хIукуматрай ссуссукьу хьуну дур. Му дунияллул экономика «байча» щилай нанисса иширащал бавхIуну бушивугу чIалай бур. Жула зунттаву дирхьусса районнай яхъанахъисса инсантал, мукунма Ккуллал райондалиймигу, захIмат къабувну яхьун къашайшиву кIулну, цала хIарачат цивппа буллалисса инсантал бур. Жула Республикалул БакIчинал, кIулну вай зунттаву яхъанахъисса инсантуран цукун захIматну буссарив, цахъис бухьурчагу вайннал оьрму бигьа бувансса умудрай, 2016-ку шин баян бувна Зунттал шинну. Зунттал шин тIитIаврин хас дурну тяхъашивуртту дурну, республикалул лахъсса къуллугъирттай зузисса хъамалгу бувкIун, Хъювхъиял шяраву хъинну ххаллилсса байран дуван бювхъунни. Дагъусттаннал экономикалул министр Раюдин Юсуповлул, байрандалийн бавтIсса инсантал барча буллай, бувсуна цайнма шийн, Хъювхъиял шяравун, хъамалу оьвчайхту, чIирисса, зунттавусса шяраву цу икIайссар, тIисса пикригума хьушиву.
— Шиккусса мухлукьат янилун багьайхту, ттул дакI ххарил дирчIавай дур лакрал миллатран цала ватан укун ххирану дуну тIий. Ядувара буттахъая жучIанна ирсирай нанисса аьдатру, багьу-бизу, культура ва оьрму бутан кIулшиву, — куна ванал.
Хъинну лавайсса даражалий хьунабавкьуна Хъювхъиял жяматрал хъамал. Га кьини хъарас щуна, тIивтIуна цIуну бакьин бувсса шяраваллил бухсса ламу, тIивтIуна Аьрасатнал халкьуннал аслийсса культуралул къатри, ккурчIа. Ккаккан дурна концерт, тIивтIуну бия авадансса ссупра. Ганиннинма бакьин бувну тIивтIуссар Хъювхъиял шяраву оьрчIал багъ, ххюнкIрал ферма. Вай циняв давурттив дурссар райондалул чиваркIуннал цала арцух. Эбрат ласунну журагу вайннаяту.
Ккуллал райондалул жагьилтурал, дукIува кунма, Щуну-Зунттул ца хъицIлий бивщуссар Ххувшаврил ттугъ. ЧIяйннал шяравусса СССР-данул Виричу ЦIаххуй Маккаевлул гьайкалданучIату, Ваччавсса СССР-данул кIийла Виричу АхIмад-Хан Султаннул гьайкалданучIан бияннин, лавгссар «Абадлийсса полкрал» суратирттащал. Майрал 9-нний Къяннал шяравасса ватанчинал Энгельс ХIажимахIаммадовлул дяъвилий жанну кьурван дурсса чиваркIуннан тIиртIусса гьалкалданучIа хьуссар райондалул аьмсса байран.
Циняв райондалий хьусса жяматийсса байранну, ххуйшивуртту, ишру кIицI къабулларчагу, чIярусса ххуй-ххуйсса давуртту дурссар. Хьуссар «Наследие» фестиваль, бакьин буллай буссар ЯтIулахъаваллийхсса ххуллу, Ккуллал шяраву цIу буллай буссар Спортрал ва жагьилтурал центр. Бур райондалий ишбажаранчитал, фермертал республикалул грантру ларсъсса. Зун бивкIссар жула райондалий «Эхо гор» тIисса интернет СМИ. Низамрайн дуцавай буссар шяраваллавусса, кIичIирттан цIарду дирзун, къатрал сияхI.
ХIасил, чIявуми жул райондалийсса инсантал ятту-гъаттараха зузисса зузалт бур. Умуд бур хъуруннилми давурттивгу хъит учин дуван бю_хъанссар тIисса.
На ттула чулуха ва Ккуллал райондалул муниципал сакиншиндарал зузалтрал чулуха барча буллай ура Ккуллал райондалул жямат, циняв, чув яхъанай бухьурчагу, лакну хъанахъисса жула инсантал. ЧIа тIий ура миннан цIуллушиву ва оьрмулуву тIайлабацIуртту. Барча зул цIусса 2017-ку шин!
Юсуп МахIаммадов,
Лакрал райондалул муниципал сакиншиндарал бакIчи
Жуятуaра нанисса шин, билаятрайсса экономикалул тагьар захIматсса душиврух къабурувгун, Лакрал райондалуцIун даркьусса хьунни.
Райондалул депутатътурал, шяраваллал бакIчитурал, спонсортурал ва жяматрал гьурттушиннарайну чулийн буккан бан бювхъунни цаппарасса мурадру.
Цалчинма-цалчин кIицI банна, жулла райондалия бувксса министртал – виваллил иширттал министр Аьбдурашид МахIаммадович ва культуралул министр Зарема Ажуевна гьурттуну лавайсса даражалий дарду Дагъусттаннал ВУЗ-ирдаву хьхьичIунну дуклакисса студентътуращалсса хьунабакьаву. Миннан райондалул чулуха ва кIиягу министрнал цала чулуха буллуссар Барчаллагьрал чагъарду ва арцуйнусса бахшишру.
Агьамсса иш хьуссар Гъумук, ттизаманнул тIалавшиннардацIунгу бавкьусса, къулайсса шартIирдалгу дузалсса, 60 оьрчIансса детсад тIитIаву. Уттинин райондалий буссия бувагу ца детсад. ЦIусса идара тIитIаврийну лагма щархъавасса оьрчIру кьамул бансса кIанттурду хьуссар ва мунищалва архIал райондалий зунсса кIанттурдугу ххи хьуссар.
Бакьин бувну къуртал бувссар Гъумучиял бяр, мунил лагма-ялттусса кIантту. Бувцуссар чани, бивхьуссар скамейкарду.
Лайкьсса даражалий хьуссар райондалия увксса кIия хьхьичIунсса спортсменнал цIанийсса турнирду — Лакрал райондалий оьрчIал ва чIаважагьилтурал школагу сакин бувну, мунил директорну тамансса шиннардий зий ивкIсса Ибрагьим ХIажиевлул аьпалун хас дурсса республикалул цайми районнаясса командарттугу гьуртту хьусса лачIун буккаврил турнир ва Дагъусттаннал волейболданул цачIундур командалул капитанну ивкIсса Нуруллагь Оьмаровлул оьрмулун 80 шин там шаврил юбилейран хас дурсса волейболданул турнир. Райондалий ялагу чIярусса дурссар спортрал мероприятияртту. Хъуннасса къулагъас дуллай буссар ялун нанисса ник спортрахун машхул даврих, дузал дуллай буссару миннансса шартIру. Масалдаран, Хъурхърал шяраву, цала шярава бувксса ишбажаранчитуралгу кумаграцIух, бувссар футболданий буккайсса майдан. Му тIитIлатIисса шадлугъгу хьуссар лавайсса даражалий, щала Аьрасатнаву ялапар хъанахъисса жагьилталгу бувкIун, хьуссар хъуннасса спортрал байран. Мукунмасса, футболданий буккайсса, майдан бувну къуртал бавай буссар Щардал шяравугу.
Спонсортурал сипталийну ва харжлугърацIух цIубуккан бувссар Хьуривсса хьхьичIавасса мизит — Аьрасатнал Конституциялул судрал судья ХIадис ХIажиевлул; Кьукнивсса ХIажимуса-хIажинал цIанийсса мизит цIубуккан бувссар ЦIаххаев Мурадлул. Райондалул каялувчиталгу, жяматгу барчаллагьрай буссару райондалул иширттаву чIарав бацIлацIисса инсантурайн. Хаснува райондалул жяматрал барчаллагьран лайкьну увккунни ДР-лул Халкьуннал Мажлисрал депутат ЖахIпар Абуев. Цува депутатшиврийнсса кандидат шайхту ванал, цала жиплува хъунмасса харж буккан бувну, Гъумучиял школалий цинявппа чIавахьултту ва нузру даххана дурссар. Ремонтру дурссар Гъумучиял детсадрай ва больницалийгу.
Къуртал бавай буссар КIулушацIун бияннинсса ххуллу. Му ххуллу уттагу бувну, агьамми давуртту дурссар. Экономикалул захIматсса тагьарданух къабурувгун, райондалул бюджетрава бакьин бувссар Инишавсса, Аьхъаравсса, Убравсса, ТIулизмавсса, Хъуннахьхьунсса ххуллурду.
Бакьин бувссар Ххюлусмату Гъумукунсса, захIматсса кIанттайсса щинаххуллурду. Ва ишираву хъуннасса даву дурссар шяраваллил цIусса бакIчи МахIаммад ХIусниевлул. Ванангу хъунмасса барчаллагь.
Райондалул магьирлугъравугу ххарисса иш хьуссар – «Гъази-Гъумучи» къавтIаврил ансамбль лайкь хьуссар «Душа Дагестана» премиялун.
Ттигъанну ЯтIул ламуй тIитIарду жула цIанихсса ватанлув, Дагъусттаннал ххуллурдал идаралий жаваблувсса давурттай зий ивкIсса Оьмари Аскандаровлул гьайкал. Ва дугърисса даву цала харжлугърах дунни Оьмари МахIаммадовичлул цалагу хьхьичIунсса дус, «Дагавтодорданул» каялувчи Загьид Хучбаровлул.
Уттиния тихуннайгу райондалул даража гьаз бансса, агьалинал багьу-бизу ххуй бансса давурттив дуллан хIарачат банну.
ЦIусса шин Лакрал райондалун, щалагу республикалул агьалинан даркьусса, барачатсса хьуннав. ЗахIматсса шартIирдах къабурувгун, шяраваллаву мина дирхьуну, буттал улча ябуллалиминнан, хъу-лухччинуха, ризкьи-кьинилуха зузиминнан тIайлабацIу чIа тIий ура. Зу дуллалимур дюхъаннав, ахир хайрданийн дукканнав.
МахIаммадхIажи Айдиев, ЦIуссалакрал райондалул муниципал
сакиншиндарал бакIчи
Щалагу дунияллийссагу, Аьрасатнавуссагу бигьа дакъасса тагьар, цинявннан кунна, жул райондалунгу асар хьунни. Цаппара лябукку буну щаллу хьуну ччисса масъалартту лахъи лагарчагу, ххарисса, ххуйсса ишругу чансса къавхьунни райондалий. Ттунмагу, райондалул жяматрангу дакIний личIансса ххарисса ва хъуннасса агьамшиву дусса иш хьунни ноябрь зурул 25-нний Гьамиящиял шяраву Туркнал инвестортурал бувсса «Алмар Каспиан» завод тIитIаву. Завод тIитIарду, Туркнавасса инвесторталгу, республикалул къуллугъчиталгу бувкIун, шадлугърал даражалий. Строительствалул давриву ишла дувайсса муххал конструкцияртту итадакьайссар ва заводрай. ХIакьинусса кьини 75 инсаннансса зузи кIанттурду дузал хьуну буссар шикку.
Республикалул агьали зунсса кIанттурду бакъа, давуртту дакъа ливчIсса чIумал, жула райондалий инсантал давурттал дузал бансса укунсса объект тIитIаврия хъинну рязину ура.
ЦIуссаккуллал шяраву бувну къуртал шавай буссар теплицардал комплекс. Шинал лажиндарай райондалий 8 инвестпроект бартбигьавриха чялишну зий бивкIру.
Дуклаки оьрчIангу, нитти-буттан ва учительтурангу ххаллилсса бахшишну хьунни КIулшивурттал кьини, сентябрь зурул 1-нний, АхIмад-хан Султаннул цIанийсса ЦIуссаккуллал школалий тIивтIусса 140 оьрчIансса цIусса корпус. Цинярдагу дарсирдал кабинетру бакъассагу, цIусса корпусраву буссар цIуллу-сагъшиврул ссуссукьушиву думиннансса хасъсса классру, цимурцаннул лащу-щаллусса спортзал, медициналул ва дуки-хIачIиялул блокру, логопеднал ва психологнал кабинетру, библиотека, актовый зал. ЦIуминалийсса щархъаву ЦIуссаккуллал школа бия яла чIявусса оьрчIру заназисса школа. Классру биял къахъанай, оьрчIру шанна сменалий занай буссия школалийн. Ва корпус тIивтIуния махъ шиккугу вайми школарттай кунма ца сменалий занай буссар. ЦIусса корпус тIитIаврия оьрчIангу, учительтуран ва нитти-буттангу хъуннасса рахIатшиву хьунни. Школалул цIусса корпус тIитIлатIисса мажлисрайн бувкIун бия ДР-лул миллатрал политикалул министр Татьяна Гамалей, ПаччахIлугърал кадрардал ва наградартту дулаврил давриха зузисса Артур Исрапилов ва цаймигу къуллугъчитал. Артур Исрапиловлул цIусса школалун бахшиш дунни интерактивная доска.
Май зуруйгу райондалий хьунни кIира агьамсса мероприятие. ЦIуссачIурттащиял шяраву чIявусса инсанталгу бавтIун бюхттулсса даражалий ларгунни лакрал жагьилтурал дянивсса Лакку билаятрал Кубокрал цIанийсса футболданул турнир.
Ххувшаврил байрандалул кьини тIурча райондалий дацIан дарду кIира гьайкал: ЦIуссачIурттащиял шяраву Хъунмасса Буттал кIанттул цIанийсса дяъвилий ливтIуминнан ва 1999 шиналсса дяъвилул иширттаву къуллугърал бурж биттур буллай жанну дуллусса полициялул зузалтран, Гьамиящиял шяраву — ЦIуссалакрал райондалийн бизан бувсса Цунди-Шабдух шяраваллавасса (Гумбетуллал район) Буттал кIанттул цIанийсса дяъвилий жанну дуллусса вирттавран. Райондалул жяматгу, навагу ххари хьунсса иш жучIа цамургу хьунни. Тарбиялул даву ва дуклаки оьрчIру спортрахун машхул баврил даву ци даражалий дурив кIул баву мурадрай Дагъусттаннал Минобразованиялул ва Минспортрал дурсса 30-нния ливчусса спортшколартту гьуртту хьусса республикалул конкурсрай ЦIуссалакрал спортшколалул 1-мур кIану бувгьунни. Республикалул спортшколардал дянив жул школа мудангу кьиматрай буссар личIи-личIисса соревнованиярттай хьхьичIунсса кIанттурду бугьаврийн бувну. Шинал лажиндарай райондалийн цIуссалак цIусса миналийн бизан баврил, мукунма цаймигу райондалун агьамшиву масъаларттал хIакъираву жучIан бувкIунни хъунисса къуллугъчитал.
Гьай-гьай, хIакьинугу жул яла цIурувкьюмур масъала бизан баврил масъала бур. Шаймур буллай буру му масъала жула инсантуран зарал къахьунну щаллу бан.
ЦIусса шинал чIярусса ххаришивуртту, тIааьнсса дахханашивуртту, тIайлабацIурду чIа тIий ура ЦIуссалакрал жяматран. Райондалул агьалинан къулайшивуртту хьунсса, экономика хьхьичIуннай хьунсса, жяматрал багьу-бизулул даража гьаз бансса проектру дузал бансса, цIу-цIусса объектру тIитIинсса каши-кьудрат дулуннав жухьхьунна. Зал архIал ацIаннав.
Муслим Даххаев,
Дагъусттаннал УФСИН-лул хъунама, виваллил
службалул генерал-майор
Ва жуятура нанисса шинал яла нава рязисса ва дакIний личIансса иш хьунни мадара хIаллай дуллай бивкIсса МахIачкъалаливсса 1000 инсаннансса 1-мур СИЗО-лул къатри, европанал стандартирттайсса шартIругу дузал дурну, къуртал дан бювхъунни.
Му бакъассагу, чIярусса жула идарарттай ва исправительный колониярттаaй капитальный ремонтру дурну, щябивкIминнан къулайсса шартIру дузал дарду.
Ларгсса шинал жу бакIрайн ларсъссия 110 миллиондалунсса производствалул план. Му план ттуршвагу процентрал щаллу дан бювхъунни. Вагу жул даврил ххуйсса ккаккиялун ккалли дан бучIиссар, цайми Аьрасатнал регионнайсса жул куннасса идарарттай укунсса планну 50%-дагу щаллу дуллай бакъар. Ялагу, ларгсса шинал жул идарартту, жул даву ххал дан бувкIунни личIи-личIисса инсаннал ихтиярду дуруччаврил ялув бавцIусса комиссияртту. Миннувух бия Аьрасатнал ПрезидентначIасса Граждан общество хьхьичIуннай даврил ва инсаннал ихтиярду дуруччаврил советрал председатель Михаил Федотов бакIчисса хъуннасса сий дусса комиссиягу. Цинявппагу идарартту ххал бувну, миннал лавайсса кьимат бивщунни жул даврин, идарарттайсса шартIирдан ва администрациялул дуснакь бувминнахсса къулагъасран. Ларгсса шинал жу лахъа-хъунну кIицI дарду Дагъусттаннал УФСИН-лул спецназрал отдел «Орел» сакин хьуну 25 шин шаврил юбилей. Бахшишру дарду хьхьичIунсса зузалтран.
Гьай-гьай, гьар цимурца жува рязиссагу къавхьунни. Ларгмургу, мунияр хьхьичIмургу шиннай, оптимизация дуллалиссар тIий, жун чIявусса зузалт даврия гьан бан багьунни. Му зат хъинну асар хьунни жул даврин. Хъуннасса хъар лахъан багьунни вайми зузалтран. ЦIусса шинал жула къуллугърал буржру цила багьайкун биттур буллан жагьилсса гъира-шавкь дусса зузалт давурттайн буцинсса каши дуллуну ччива жухьхьунна.
ЗахIматшивурттах къабурувгун, зузалт зун гъира буну бур, дакI марцIну биттур буллай бур цала къуллугърал буржру. ХIасил, цинявппагу хIарачат буллай буру жучIанма багьсса инсантал, хъиннува зия хьун къабивтун, тIайласса ххуллийн буцин, ххуймунийн хьул-умудирттащал итабакьин.
ЦIусса шинащал барча буллай ура хьхьичIва-хьхьичI жула системалуву зузисса цинявппагу. ЧIа тIий ура цIуллушиву, ужагъирттаву рахIатшиву, дуллалимуниву тIайлабацIу. ЦIусса шин ларгмунияр тIайлабацIусса, ххарисса хьуннав.
Барча буллай ура мукунма ЦIуссалакрал райондалул, Новостройрал агьлу, цинявппагу лак.
ЖуцIунна даркьусса, буллугъсса, барачатсса шин хьуннав. Цинявннал мурадру бартлаганнав.
