Мартрал 26-нний МахIачкъалалив цалчин дурсса аьмсса субботникрай гьуртту хьуну ур 100 азараксса инсан.

Республикалул БакIчинал шагьрулул парк ххал бувунни

Ларгсса ххуллун кьини рес­публикалул циняв шагьрурдай ва районнал щархъаву хьунни чIявусса мухлукь гьур­ттусса субботникру. Субботникирттайн бувккунни гьарцагу идарарттал, фирмардал, компаниярттал пишакартурал коллективру ва цалва-цалва къат­рал хьхьичIалу лакьин укунма­сса халкь.
Ва кьини МахIачкъалалив Лениннул Комсомолданул цIанийсса паркраву хьусса субботникрай мукуна гьуртту хьунни Республикалул БакIчи Рамазан АьбдуллатIипов. Шикку БакIчинал, киражрай цаппара мурхьругу хIулувхIуну, паркравусса СаллатIнал гьайкалданучIа тIутIив дирхьунни.
Журналистътуращал хьусса хъун бакъасса ихтилатраву Рамазан АьбдуллатIиповлул кIицI лавгунни, шагьрулий ххуйсса чIалансса дахханашивуртту хъанай душиву ва ца мэрнан цалалу, жямат лагма къалавгун, вайксса давуртту дуван къабигьашиву.
«Дагъусттанлувтуран нач хьун аьркинссар лази-къа­лав­кьусса, чапалсса шагьрурдай, щархъаву яхъанан. Ххарину ура махъппурттуву субботникирттавух жулва чIявусса жагьилтал гьуртту хъанай тIий, миннаву хъунмасса гъира буну тIий жулва хъуншагьрулий низам дуван­сса», — увкунни ванал.
Шиккува БакIчинал къула­гъас дурунни халкь бигьалаган бучIайсса кIанттурдай, хаснува ва паркраву, оьрчIансса майданну буван аьркиншиврий, ми бялахъансса кIанттурду гьарза буван аьркиншиврий.
Хъирив Рамазан Аьб­дулла­тIипов, ДР-лул ХIукуматрал Председатель Аьбдуссамад ХIамидовлущал, паркраву дайдирхьусса давурттал ялтту увккунни. Вайннащал архIал ивкIсса шагьрулул бакIчи Муса Мусаевлул бувсунни, паркраву­сса Аьли Аьлиевлул спорткомплексрал чIарав бувантIишиву цIусса спортзаллу ва мивун букIлансса инсантурал машинарттансса автостоянка.
Шагьрулул аьмсса субботникрай

Ва кьини кIюрххила цанма-цанма ккаккан бувсса кIан­ттурдайн зун бувккун бур шагьрулул циняв къуллугъирттал пишакартал, вузирдал студентътал, жяматийсса суккушиннардил вакилтал.
Петр Первыйл кIичIирава байбивхьуну, Каспийскаллал чулинмайсса ххуллуцI зий бивкIун бур шагьрулул администрациялул муниципал къуллугъирттал, аналитикалул, делопроизводительтурал ва Информациялул технологиярттал управленияр­ттал пишакартал. Шикку вайннал ххуллуцIсса ччюрк дартIун, мурхьру ва бордюрду кIяла дурну дур. Мурхьирдал лагма бив­ххун, газоннайсса уртту ххартI дурну дур.
Шагьрулул УЖКХ-лул зузалтрал «Восточная Пальмира» хъатIив бай залданул хьхьичIух грейдер гьан дурну, гиккусса аьрщи кьа дурну дур. ЧIал къавхьуну, шагьрулул пландалийн бувну, шикку байбишинтIиссар сквер ва аллея буллай.
Агьамсса давуртту шагьрулул вайми-вайми къуллугъир­ттал дурну дур «Ак-Гель» паркраву ва МахIачкъалаллал тарихрал музейрачIа.
Спортрал, туризмалул ва жагьилтурал иширттаха зузисса Комитетрал зузалтрал «50 лет Октябрю» паркраву дурну дур вайра марцI-чапалшиврул давурттив, бувгьуну бур мурхьру, ссир бувккун бур паркравусса чапардайх, балясиннайх.
Субботникрайн мукунма бувккун бур шагьрулул МФЦ-рдал зузалт, школардал, детсадирттал учительтал ва тарбиячитал.
Цала-цала офисирттал хьхьи­чIалурду лавкьуну, шювшуну низамрайн бувцуну бур цаппара коммерциялул идарартталгу. Миннувух «Магнат», «Арси-групп», «Маис» фирмардугу.
«Мечта» стоматологиялул поликлиникалул зузалтрал хIулурхIуну, марцI дурну дур цала лагмасса чапар ва полик­линикалул хIаятраву мурхьру, тIутIив дургьуну дур.
Шагьрулул аьмсса субботникрайн бувксса гьарнахь барчаллагь тIий, шагьрулул бакIчи Муса Мусаев кIицI лаглай ур, ва аьмсса давривух гьуртту къавхьуну ливчIшиву цаппара ТСЖ-рду, АЗС-ру, медициналул клиникарду, банкетру бувайсса заллу, кафе-ресторанну. БакIчи умудрай ур зурул мутталий нантIисса вай давурттавух вайгу гьуртту хьуншиврийн ва кIицI лаглай ур укунсса ишираву кумаг аьркиннал чIарав бацIан цив хIадуршиву.

«Ахмедхановцы» — Виричунал гьайкалданучIа

Субботникрал кьини Ма­хIачкъалалив, «Ахмедхановцы» жагьилтурал суккушиндарал сипталийну, ххуйсса даву дурну дур АхIмад-Хан Султаннул гьайкалданучIагу. Гьайкалданул лагма-ялтту марцI-чапалшиву лакьлакьисса давриву гьуртту хьуну бур «Единая Россия» партиялул чул бувгьу­сса жагьилтал. ДР-лул Жагьилтурал иширттаха зузисса министерствалул пишакар Лаура Кьурбановал каялувшиндаралу кIюрххила бувксса волонтертурал Виричунал гьайкал шюршуну, марцI дурну, газоннал лагма- ялттусса бордюрду кIяла дурну дур. Лаура Кьурбановал бусаврийну, республикалул жагьилтуран хъунмасса пахру бу­сса бур Совет Союзрал кIийла Виричу АхIмад-Хан Султаннул аьпалунсса ва давривух гьуртту хьун.

Шагьрулий щюллишиву чIяру хьуншиврул

МахIачкъалаллал Кировский райондалий дур­сса субботникравух гьуртту хьуну бур 200-нная ливчусса зузалт. Вайннан гьарнан кка­ккан бувну бивкIссар райондалул цанма-цанмасса кIичIиртту. Субботник­райн мукуна увккун ур, цалва администрациялул зузалтращал, ва райондалул бакIчи СалихI Сагидовгу. Шикку вайннал, цIинцI-ччюрклицIа марцIгу бувну, кIичIирттаву, ххуллурдацI мурхьру, къатIри бувгьуну бур.Аьмну райондалий кIани-кIанттурдайх кIиазарунниха ливчусса мурхьру бувгьуну бур .
Вай давуртту дан щурущи дурну дур 52 спецтехника: мурхьирдал ялувсса къяртри кьукьинсса вышкарду, кIичIиртту шюшай машинарду, цIинцI ду­ххай машинарду ва цаймигу.