«Зунттурду – жулла аваданшивур»

УнцIукIуллал райондалий Дагъусттаннал БакIчи Рамазан АьбдуллатIиповлул каялувшиврулу хьунни Зунттал шинан хасъсса давурттал хIакъиравусса совещание.

Совещание тIитIлай, Рамазан АьбдуллатIиповлул увкунни: «Зунттал шин – му уттигу ца шартIри Дагъусттаннал зунттал аьрщив дугу дурурччуну, миннуя мюнпатгу ласун бюхъайсса. Зунттал шин жува баян бувссар уттигу цал къулагъас хъун даншиврул зунттал аьрщарах, ми шайссаксса ххуйну ишла дулланшиврул», — увкунни ганал.
Рамазан АьбдуллатIиповлул бувсунни уттинин щаллу дан бювхъумуния ва мукунма ттиния тихуннайгу ци дуллан аьркин­ссарив исполнительный властьрал органнал.
«Гьай-гьай, зунттурду хьун къабюхъайссар рынокрал экономикалул гьануну, зунттурду бур инсантал бигьалагайсса ва цIуллушиву цIулаган дай­сса кIану. Жура хIакьину дуллай буру районнай ххуллурдал инфраструктура лядуккан даврин хасъсса давуртту. Уттигъанну асфальт бишарду Къурагьиял райондалий, чIал къавхьуну ххуллу тIитIин най бур ЧIарадиял райондалий, ламу бишин най бур Гумбетуллал райондалий. Яла зунну ЦIумадиял, ЦIунтIиял, Ккуллал районнай. Аьркин­ссар ххуйну ишла буван ххуллул фонд, ляхълан аьркинссар арцурду дучIан дуллансса цаймигу кIанттурду. Зунттаву шяраваллил хозяйствагу лядуккан дуллан аьркинссар. Зунттурду – ми жулла аваданшивур», — увкунни Республикалул каялувчинал.
ДР-лул ХIукуматрал Председательнал хъиривчу Раюдин Юсуповлул бувсъсса куццуй, республикалул территориялул 44% бур зунттал чул, тикку ялапар хъанай ур сайки 950 азараксса инсан. Тикку дур 1166 шяравалу, миннувату 492 шяравун биян захIматссар. Мунийн бувну бувчIлай бур, циваннив зун­ттал чулийн ляличIисса къула­гъас дикIан аьркинсса.
Р. Юсуповлул мукъурттийн бувну, Зунттал шинан хасну зунттал районнай дан аьркин­ссар 2016 шинал 4,5 млрд. къуруширттансса давуртту, миннувату республикалул бюджетрава личIи дуллалиссар 2,8 млрд. къуруширттал ва 1,7 млрд. къуруширттал бюджетрал дакъами арцурду.
Совещаниялий ихтилатру бунни мукунма ДР-лул Ххуллурдал хозяйствалул агентствалул каялувчи Загьид Ххучбаровлул, Шяраваллил хозяйствалул НИИ-рал директор Надир Загьировлул, Гъуниннал райондалул бакIчи МахIаммад Пахру­ттиновлул ва цайминналгу.