Ларгсса 2015 шин, билаятрал бакIчинал баян бувну диркIсса куццуй, Литературалул шин кIицI лагарду жура. Нагу ва иширацIун бавхIуну республикалул сайки циняв шагьрурдайн ва районнайн бивра, цаппара аьрххирду хьунни Дагъусттаннал кьатIувгу.

Аьрххи-ххуллурду чун багьарчагу жущалсса, шаэртуращалсса ва чичултращалсса, хьунабакьавуртту хьунни хъамакъаритансса. Яла дакIний личIансса хьунабакьурттугу хьунни вузирдаву ва школардай, ялун нани­сса жула жагьи-жугьултращал ва миннал тарбиячитуращал. ЧIалан бикIайва жухва ялугьлай бивкIшиву, жул творчествардах гъира бушиву, жул хIурмат хъунмасса бушиву. Ттун ттунмагу ххирассар учительтурал ва миннал дуклаки оьрчIал хIадур дурми хьунабакьавуртту. Ца мукунсса, ттула дакIнил лавсъсса школа бур МахIачкъалаллал Красноармейскалийсса №25-сса школа. Ва бур хъинну бавкьусса, нахIу-хIаласса коллектив цачIун хьусса школа. Шикку директорнугу бур лакку инсан Бакунова Асват Кьурбановна. Ттул хIурмат хъунмасса ва школалийн ттуйн вайннал оьвчай цачIара хъанахъисса шадлугъирттайнгу, байраннайнгу, хьунабакьавурттайнгу.
Циваннив къакIулли, ттула буттал шяравун наниссак­сса ххари шара. Архния чIалачIисса зунттал бакIал ишрив ягу поселокрайсса халкьуннал дакIру хъиншиврул ишривгу къа­кIулли.. Хъинну дакIру аьчухсса, ненттабакIру тIивтIусса халкь бур шикку яхъанай. Поселок­рал бакIчину ивкIсса Абубакар Кьурбанисмяиловлулгу хъамалу бувну, хIакьсса зунтталчунал кунма, цIу-ччатIгу бивхьуну тIайла буккайссияв. Цувагу хъинну учительтурал захIматрал кьадру кIулсса икIайва. Шикку­сса школалул коллективращал­сса дусшивугу ттул ляличIисса дур. Вай бур ттул кулпатрава кунмасса халкь. Цанчирча Асват Кьурбановнал ва коллективрал цалва хъамаллурах дувайну тIий жула буттал бутта­хъал аьдатраву диркIсса кунна­сса ургъил-аякьа. Красноармейскалий хъунмурчIин яхъанай бур даргиял халкь. Школалийгу чIявуми учительтал бур дарги. Амма, Асват Кьурбановнал бюхъулийну, дусшиврул кьимат лахъсса коллективраву цума ци миллатрая уссарив кIул уллан­сса, хъирив лаллансса чIун да­къассар. Гьарма уссар цала ялув цува зий, цалва дуклаки оьрчIал ялув захIмат бихьлай. Хъинну лахъсса даражалий лагайссар Хъун дяъвилул гьурттучитуращалсса, шаэртуращалсса, аьлимтуращалсса, шяравасса хъуничувтуращалсса хьунабакьавур­тту, миннан хасъсса шадлугъру.
Школалий Асват Бакунова зий бур 2003 шиная шихунмай. Коллективравугу, дуклаки оьрчIал ва миннал нитти-буттал чулухассагу хIурмат-бусрав хIалал бувсса каялувчи бур. Асват Кьурбановна школалий зун бивкIния махъ шинай 10-11 учитель тIайла уккайссар цалва пишакаршиврул даража лахъ байсса курсирдайн, школалий байбихьулул классирттаву дихьлай буссар ниттил мазурдил дарсру, гьуртту шай­ссар республикалул ва шагьрулул личIи-личIисса конкурсир­ттай ва олимпиадарттай. Миккугу хьхьичIунсса кIанттурдан лайкь шайссар.
Шикку зий ур цалчинмур категория бусса 34 учитель ва лахъмур категория бусса 7 учитель. 11 учитель лайкь хьуну ур «Отличник народного образования» цIанин.
Дуклаки оьрчIругу дуккав­рия махъмур чIумал оьнма бакъассар. Асват Кьурбановнал хIарачатрайну, шикку­сса оьрчIру кьамул бувну бур ТОКС-рал кьюкьлувун. Хъунмасса гъираращал ва гьава­сращал ва давривун кьувтIуну, жулва тарих кIул буллай, хIала-гьурттуну бур. ХIакьинугу Хъун дяъвилий ятIа-тIар бакъа бакъа хьусса аьралийтурал цIа-бакI кIул дуллай чялишну хъирив бувккун буссар.
Хъуничувтуращалсса хьунабакьавурттай шайссар ихтилатру жула миллатирттал аьдатирттая, багьу-бизулия, культуралия. ОьрчIрурив дазу-зума дакъа ххарину личIайссар хъамаллурая. ЧIа-чIаннин школалий оьрчIащал хьунаакьайссар щарнил мизитрал имамгу.
Школалул дуклаки оьрчIру буххайссар дуклан республикалул хьхьичIунсса вузирдавун. Масалдаран, школалул медалистка СалихIат Арсланбековал цIа дуллуссар ДГУ-лул филологиялул факультетрайн. ЦIана му микку ца яла цIа дан лайкьсса студентътуравух буссар. Вай циняр ккаккияртту школалул директор Асват Кьурбановнал хIарачатрайнур хьусса. Ттунгурив хъинну хъунмасса пахру бикIай укунсса инсаннащал нава дусну бушиврия ва ва школалун чIа тIими ттул махъру дакIниватуссар.
Аминат Аьбдурашидова,
Дагъусттаннал
Халкьуннал шаэр