Ххал бивгьунни ЖКХ-лул ва бюджет щаллу баврил масъалартту

Ххал диргьунни Дагъусттаннал ЖКХ-лул 2015-2016 шиннардил ссутнил ва кIинтнил чIумалсса давурттал хIасиллу, 2016-2017 шиннардил ссутнил ва кIинтнил чIумуйн хIадур шаврил задачартту, ва мукунма 2015 шинал республикалул бюджет щаллу баврил масъала.

Цалчинмур масъалалул хIа­къираву ихтилат бунни ДР-лул строительствалул, архитектуралул ва ЖКХ-лул министр Ибрагьим Казибековлул.
Министрнал мукъурттийн бувну, хIадур дурну дур 7,9 млн. кв. мет­рарду тIювалул фондрал, 485 котельни, 20 центральный тепловой пункт; дакьин дурну дур 772 километра гъилишиврул сетирдал, 12623 километра щин дачайсса сетирдал, 836 километра канализациялул ва 27 километра гъилишиву дулайсса сетирдал. Дузал дурну дур аьркин­ссаксса луртанну хьюмусса ччуччиялул (мазутрал) – 122 тонна, кьянкьамур ччуччиялул (хъуручIул) – 16 азаруннияр ххишаласса тоннарду. ХIадур дурну дур 39 млн. къуруширттансса материаллал ва техникалул луртан, ЖКХ-лул объектирдай авария за хьурчангу тIий. Кучарду марцI байсса 210 техника хIадур дурну дур. ЖКХ-лул объектру сезондалул чIумуйн хIадур баву мурадрай, кIанттул бюджетирттал ва коммунал комплексрал предприятиярттал арцуяту личIи дурну дур 1650,9 млн. къурушру.
ХIукуматрал Председательнал бувсунни исполнительный властьрал органналгу, районнал ва шагьрурдал администрацияртталгу, ЖКХ-лул организациярдалгу тамансса даву дурну душиву тIювалул фонд ва ЖКХ-лул объектру 2015-2016 шинал ссутнил ва кIинтнил чIумуйн хIадур бавриву.
Мура чIумал Аь. ХIамидовлул замечание дунни муниципалитетирттай, аьркинсса даражалий арцул щаллу дуллай бакъа тIий ЖКХ-лул организациярду.
2015 шинал республикалул бюджет щаллу баврил хIакъираву бувсунни ДР-лул финансирттал министр Билал Жяъпаровлул. Ганал мукъурттийн бувну, доходру щаллу дурну дур 84 млрд. 119 млн. къуруширттал лагрулий, ягу 92,8% пландалий ккаккан дурссаннул. Налогирттал ва къаналогиртталми доход­ру дуркIун дур 21 млрд. 743 млн. къуруширттал, ягу дучIан дуван аьркинссаннул 83%, дучIан къадурну дур 4 млрд. ва 457 млн. къурушру.