ДР-лул Шяраваллил хозяйствалул министерствалий хъанай дур му министерствалул хъаттиралусса ГУП-ирдал (Государственные унитарные предприятия) финансирттан ва хозяйствар­ттал давурттан хасъсса балансирттал комиссиялул батIавуртту.
БатIавурттай гьуртту хъанай бур министр,балансирттал комиссиярттал члентал, ДР-лул Мингосимуществалул ва цаймигу мурадлувсса ведомстварттал вакилтал, предприятиярттал пишакартал, районнал шяраваллил хозяйствалул управлениярттал бакIчитал.

ХI. Аьдилов
Министерствалул каялувшиврулусса ГУП-ру мюнпатну зузаврил масъала яла агьамминнувасса цаннин ккаллийну бур. Министр М. Велимурадов, цува ГУП-ирдайн ивну, кIул хьунни кIай зузисса тагьарданущал ва цимилагу ккаккан бунни аьрщив ва паччахIлугърал хъус мюнпатну ишла дуллай бакъашиву.
Балансрал комиссиялул батIав­рий ихтилат буллай, министрнал бувсунни чара бакъа аьркинну бушиву ГУП-ру захIматсса тагьарданува буккан бан. «ГУП-ирдал давурттаву низам дишаврил масъала буссар ДР-лул БакIчинал контрольданулу, ганал цимилвагу тик­рал бувссар ГУП-ирдал давурттаву диялдакъашивуртту салкьи хьуну душиву. ЧIявуми ГУП-ирдаву зузалтран буллай бакъар харжру, дуллай бакъар налогру, биттур буллай бакъар кредитирттан хасну бакIрайн лавсмур, чанну ласлай бур бакIлахъия. Гьарца ГУП-рал масъала ххал бигьинтIиссар личIи-личIину», — увкунни министрнал.
Апрельданул 7-нний вичIи дирхьунни «Буйнакский» ГУП-рал (Къарабудахккантуллал район) ва «Комсомольское» ГУП (Хайдакьуллал район) каялувчитурах. Хъиривмур кьини ххал бивгьунни «им. К. Маркса» ГУП-рал (Дарбантуллал район), «Усемикентский» ГУП-рал ва «Утамышский» ГУП-рал (Къаяккантуллал район) ма­съалартту.