Июньдалул 1-нния тинмай ЖКХ-лул ГИС-лий (Государственная информационная система) сияхIрай къалавсъсса (регистрация къадурсса) управляющие организациярдай, ресурсснабжающие организациярдай ва кIанттул цилакаялувшиврул органнай 200 азарда къурушрал аьчIа дишин ккаккан бувну бур.
Мунил хIакъираву бувсунни ДР-лул ПаччахIлугърал тIювалул инспекциялул каялувчи Аьли Жабраиловлул. Ганал бувсмунийн бувну, ЖКХ-лул ГИС-лий информация къабишаврихлу ва мукунма га информация цила чIумал къабишаврихлу ва тIайлану къабишаврихлу ккаккан бувну бур къуллугъчитал квалификациялуцIа баву 1 шиная 3 шинайн биянцIа.
Аьли Жабраиловлул увкусса куццуй, инспекциялул гьарца кьини дайссар порталданул мониторинг, тикку ашкара дайссар регистрация къадурсса ведомствартту ва организациярду.
«ХIакьинусса кьини информациялул системалуву сияхIрайн лавсун бур республикалий зузисса циняв управляющие компанияртту. Амма Дагъусттан бур анжагъ 59-мур кIанай, мунияту тагьар мархлуцIакулла даххана дуван аьркинни. Мунийн бувну циняв организациярттайн тапшур буллай ура, коммунал хIаллихшиннансса луртанну дуллалисса циняв организациярдан аьркинну бушиву ЖКХ-лул ГИС-лий бишин цалла давур_ттал хIакъиравусса информация», — увкунни Жабраиловлул.
ХIакьинусса кьини системалуву сияхIрайн лавсун бур 100 Дагъусттаннал компания, ми зий бур ЖКХ-лул бутIуву.
Жабраиловлул мукъурттийн бувну, инсантуран ГИС ЖКХ-лул личный кабинетирттаву чIалантIиссар тарифирттал дуциннаясса информация, му информация бюхъантIиссар ишла буван платежрал документру тикку бишайни.
Мунияр ххишалагу, коммунал хIаллихшиннал муштаритураща бюхъантIиссар арцу дичин мура системалийхчил.
Инсантураща бюхъантIиссар личный кабинетрайхчил тIайла буккан цалла обращениярду ва аьрзарду региондалул тарифирттал органнайн.
