Буттал буттахъая шихуннай нанисса, инттухуннай, хъу-лухччи дугьайсса чIун гъан хъанан дикIайхту, цинярдагу лакрал щархъаву кIицI дувайсса Хъурдуккаврил, Ккурккуллал зумувну – Хъурзиккаврил, байрандалул сий ялу-ялун гьаз хъанай дур. Ва байрандалул аьдатру цинявннал ца куццуйсса дунугу, кьуру лавсъми, цаннаяр ца ялтту буккан, цIушиннарду, дахханашивуртту дан хIарачат буллан бикIай.

Андриана Аьбдуллаева
ТачIав дакъачIин гурну, тя­хъану, аваданну ларгунни гьашину Ккуркливмур хъарас щаврил байран. Ккурклив хьунтIисса байрандалия зурдардил хьхьичIва чялав багьну бия. Байран дан кьуру лавсъсса Кьадинахъал Гиланил арс СалихI ХIажиев Москавлия биялсса хъамаллуращал ва багьлул ххирасса бахшиширттащал най усса ур тIий ялугьлай бия щарнил жямат.
Хъуними хIадур хъанай бия хъамал лайкьну кьамул бан, жагьилтал ва мюрщулт – бяст-ччаллаву ххув хьуну бахшишру ласун.
Уттара дурккун дия Ккурккуллал щар. Шяравун нех дирхьуну най бия машинартту. Къатта ба­къая хъамал бакъасса. Кьинигу, Аллагьнал кабавкьуну, даркьусса, дару­сса хьуна.
Шяраваллил ккурчIав бавтIун бия мухлукьат халкьуннал. Шикку бия Москавлия, МахIачкъалалия бувкIсса хъамал, лагмасса лакрал ва даргиял щархъал агьлу.
Бусравсса хъамаллураву бия машгьурсса спортсментал Владимир Минеев, Расул Мирзаев, Аьли Багьауттинов, ХIажимурад Мачаев, Ширвани Мурадов. Вай бувцуну увкIун ия СалихIлул ссурахъу Fight nights компаниялул гьану бивзсса Камил ХIажиев. Мюрщимигу, хъунимигу вайннащал бацIлай, дакIний личIансса суратру ришлай бия. Нагу рищав сант дирирну дуна ца сурат цIа дурксса Владимир Минеевлущал. Ккурклив байран дусса бавну, тIахIунттащал бувкIун бия бархъал, къутта кьяпращал дарги, бия цаймигу тиха-шиха дахху-ласу дан бувкIсса. ЧиваркI бия авур­сса чуллу-чухъраву, душварай дия цаннияр ца ххуйсса гузмарду ва ни­ттихъал буттукьирттава дуккан дур­сса никIалай карщив. Спортсменталгу, жулла аьдатрал хIурмат бувну, чиллу-чухъри ларххун ва къутта кьяпри бивхьуну бия.
Ккурккуллал жяматгу, вайннал кьини хъун дан бувкIсса хъамалгу байрандалущал барча буллалисса ихтилат бунни Лакрал райондалул бакIчи Юсуп МахIаммадовлул.
— Жулва буттахъул оьрмулухун аьрщараха зий, хъу-лухччи дугьлай, маэшат буллай бивкIссар, жува мудангу аьрщараллу бакI буккан буллай бивкIсса. ХIакьину чIярусса дукъаргьусса аьрщив дур жучIара, Лакрал райондалий, чIявусса бур къуллугъ къабуллалисса багъру. Шанна-мукьра шинал дянив 20-хъул гектар багъирдал дургьу­ссар, 15 гектар бухсса багъирдал цIудуккан дурссар. ХIалли-хIаллих тIий буттахъал аьдатру жучIанна махъуннай зана дикIлай дур. Жулва халкьуннавун аьрщараха зунсса гъира-гьавас бутан ва байран дуллай тIий на рязину икIара. Барчаллагь тIий ура СалихIлухь, ва кунма­сса буттахъал аьдатру ядан хIарачат буллалисса лакрал чиваркIуннахь, — увкунни Юсуп МахIаммадовлул.
Хъирив цинявннал хьхьичI Ккурклив Хъурдуккаврил байрандалийн увкIсса Граждан обороналул ва ЧС-дал иширттал министерствалул вакилнал бувсунни МЧС-рал хIукму бушиву Ккур­ккуллал шяраву 27-мур пожарно-спасательная частьрал пожарно-спасательный пост бансса.
Му ххуйсса хаваргу хъатру ришлай ххарину кьамул бувну, циняв­ппа дастта-дасттарду дурну бавчунни школалул къатрал хьхьичIсса хъарас щун хIадур бувсса къурув. Шичча арх бакъа бия 200-300 инсан лагайсса чятир. МарщацI бивзун бия дукрарду шахьлахьисса хъуни кIункIурду. Архнияра ришлай дия нахIусса дукралул кьанкьру. Хъун хъузала СалихI, рахIугу, къу­тта кьяпагу лавххун, чIюлу бувсса балчаннучIан гъан хьуну, хъарас дугьайхту, гьарица чулуха мюрщи-хъуни бувккун, щинал бадрарду бутIлай чят унни му, Хъарас щусса аьрщаравун гьаннагу бивчуну, дуаьрдугу дурну махъ байбивхьунни спортрал бяст-ччаллу: дучри ххя­ххан баву, пут личаву, лечаву, ка дишаву, турникрай упражненияртту баву. Ххув хьуминнан, грамотартту дакъассагу, буллай бия велосипед­ру, телефонну, ссятру, арцущал­сса конвертру.
Хъирив цинявппа бувххунни чятирдануву тIивтIусса авадан­сса ссуп­ралухун. Шиккусса мажлис байбивхьунни МухIсин Камаловлул. Ванал лакрал гимн щаллу дурну махъ, дайдирхьунни бартардал конкурс. Дакъасса журалул барта да­къая ккаккиялун дирхьуну. Ккурккуллал душварал хIарачат бувну бия хъамал хIайран бан, гьай-гьай, бахшишгу ласун. Бартардал дегустатортал хьунни ялув кIицI лавгсса машгьурсса спортсментал. Приз ларсунни кIяласса кIиянналия дурсса бартлул.
Призру дуллунни мукунна яла авурми миллатрал лаххиялух, хIатта ва кьини Ккурккуллал душваврай­сса лаххия цаннияр ца ххуйсса дия.
Ккурккуллал байран лахъа-хъун дан бувкIун бия Дагъусттаннал эстрадалул чаннацIуртти Нурианна Къаллаева, Саният Рамазанова, Карин Кьадинаев, Даниэл Гьарунов, Залина Телидзе ва м.ц. Вайннал балайрдахунсса гурсса ссувхIат най бия кIюрххицIуннин.
СсувхIатрай ца авурну лезгинкалий ивзун цинявппа хIайран бунни Владимир Минеевлул. Жулла чиллу-чухъа цайрагу ца даркьуну дияхха. ­