Муниципал къуллугъирттай зузиминнал Кьинилун хасну Ма­хIачкъалаллал администрациялул конференц-залдануву хьунни шадлугърал батIаву. Цалва-цалва пишардай хьхьичIунну ва цIа данну зузисса пишакартуран батIаврий дуллунни личIи-личIисса бахшишру. БатIаву дайдирхьунни Аьрасатнал ва Дагъусттаннал гимнру щаллу даврийну.

Бахшишру дулун хьхьичI хъуншагьрулул бакIчи Муса Мусаевлул, КIанттурдайсса цалакаялувшиврул кьинилущал циняв барчагу бувну, кIицI лавгунни ва байран шагьрулул округирттал, муниципал районнал, шагьрурдал ва щархъал поселениярттал жаваблувсса пишардай зузиминнал байран душиву. Мукунна чIурчIав дурунни, цала-цала муниципалитетирттай хъанахъисса иширттах баччибакъулшиву къадурну, цивппа яхъанахъисса кIанттурдал масъаларттая хавар бусса укунмасса халкьунналгу байран душиврий.
«Жува буру халкьуннал мурад­ру щаллу бан зун бивтсса халкь. Муниципал къуллугъирттайсса аьй-бювкьурдугу, цIарду дуллалавур­ттугу хъунмурчIин 90% тIайлассар. Жущавар бюхъантIисса жулла даву ххуйну дуллангу, халкь рязи банну миннал мурадру щаллу банну зунгу. Шикку зузисса 10 зурул мутталий жущара къачансса давуртту дуван бювхъунни, сайки 14 проект щурущи дуварду. Шагьрулий цIана хъунисса 3 ламу бакьин буллай байбивхьуну буссар, Редукторныйлий ва Сепараторныйлий скверду бувну ва буллай сукку хьуну буссар, ХIамзатовлул ва Ахъушинскийл кIичIирттаву ххуллурду гьарта буллалисса давуртту най дуссар ва Шамиллул кIичIираву, «1000 мелочей» ттучандалул чIарах, Редукторныйлийн ххуллу буллай байбишин хIадур хъанай буссар. Вайннува чIяруми давурттив дуллай буссар шагьрулул хазналувасса арцух.
ЧIярусса захIматшивуртту администрациялун хьунадаркьунни халкь кьамул бувну, миннах вичIидишавривугу. Жун шикку лявкъунни 7 шинал хьхьичI цалва-цалва масъаларттал хъирив був­ккун бивкIсса халкьуннаясса 65 000 аьрза. Миннува дахьва 4500 аьрза ххалбигьарду. Гайминнунсса жавабругу чан-чанну тIий дулунну. Жущава щаллу бан хъанахъимур цайми идарарттайн къабувккун щаллу банмур банну. Амма шагьрулул ца яла цIурувкьюмур масъалану личIлай бур жула халкьуннал багьу-бизулул культура дакъашиву, шагьрулийн хъамалу бувкIсса жулва жагьилтурал духIин дакъашиву.
Шагьрулий дуллалисса давур_ттавугу жу яла ххуймур, язимур материалдания дурсса матахI дихьлай буссару. Масалдаран, Родопский бульварданий пластикрал плафонну дуркьун, пюрундалулсса дихьлай буру. Вай хьхьичIсса 5 зурул дяниву 104 мукунсса плафон гъаргъунни. Родопский бульварданий вай гьант­рай цIусса аллея тIитIарду. Хъиривва 27 мурхь ва 4 ттарлил мурхь бавцуну лявкъунни. Вагу «Горзеленхозрал» бугьан ччисса халкьуннан къулбасралу 4000 мурхь укунма бавчIуну буна. МурхьирдацIун ва тIутIацIун бацлай бур ччюрк дичайсса бакру ва цаймигу затру. Жула халкьуннан маслихIат бан ччива, жуцIун кабакьира, жу дуллалимур лиян мадулларду куну. Ахиргу, гьарнангу вай къабигьасса къуллу­гъирттай зузиминнан чIа учин ччива цIуллушиву ва жулва шагьру низамрайн буцлансса даврихухсса гъира!» — увкунни бакIчинал.
Муса Мусаевлул цIа дурунни Кировский райондалул бакIчи СалихI Сагидовлуя, Правовой управлениялул каялувчи Мурад Сулаймановлуя, «Горзеленхоз» МУП-рал каялувчи Раджаб Раджабовлуя. Хъирив бакIчинал цалва пишакартуран личIи-личIисса даражалул бахшишру дуллунни.
Шиккува кIицI лаган, шагьрулул районнал администрациярдай зий усса ур 829 инсан, миннава 235 инсан – шагьрулул администрациялий.