МАММАЛ ДУШ МУСИЕВА УММУКУЛСУН
Мартрал 31-нний, оьрмулул 63 шинаву, захIматсса азаруннища ххассал бан къавхьуну, дунияллия лавгунни Маммал душ Мусиева Уммукулсун.
Уммукулсун бувссар июньдалул 27-нний 1953 шинал Ккуллал шяраву Маммал ва Чачардул кулпатраву. 1970 шинал бу­ттал шяраву дянивмур даражалул школагу къуртал бувну, бувхссия Дагъусттаннал паччахIлугърал мединститутравун. 1976 шинал ххуйсса ккаккиярттащал вагу къуртал бувну, зун бивкIссар Кас­пийскаллал оьрчIал поликлиникалий хIакин-педиатрну.
Ва бия лавайсса хIурмат­райсса, цила пиша ххаллилну кIулсса хIакин. Цимилагу хIурматрал грамотарттан, бахшиширттан лайкь хьуссия. Лавхъун буссия шагьрулул администрациялул хIурматрал ул­ттуйнгу.
Цибанссар, лавгунни жуятува ххаллилсса зунттал хъамитайпа.
Уммукулсун аьпалухьхьун лагаврил хъуннасса кьурчIишиву кIидачIлай, жижара буллай буру ниттихь Чачардухь, ласнахь Ризваннухь, душварахь Зугьрахь ва Аминатлухь, уссурваврахь, ссихь, цинявппагу гъан-маччанахь.
Уммукулсуннул рухI алжаннул ххари даннав, гьав нурданул дуцIиннав.
Ккуллал жямат

———————-

Агь, ттул мусил бакI, Мухтар

Апрель барзгу бувкIунни,
Уртту-тIутIи хъя тIисса,
Хъя-хъя чавай дур дакIгу,
Вил кьини барча дан ччай.

 

ДучIанна арс вил гьаттайн,
Дагьанна гьаттал ялун,
Ина, чIивини куна,
Хъазамравун чIуен ан.

Ттул лякьлул бакI, ххира арс,
Циняв гъили бувай баргъ,
Вила мюрщисса оьрчIру
Буттай тIий цан кьабитав.

Ххирасса уссил оьрчIан
Ятиншиву кIул къадан
ХIарачат байва ина
Утти виламиннащал
КIилчин ятинтал хьунни.

Гьарнан урчIа ка ияв,
Кьини дуркнахьхьун дулун,
Гъарая магъи шавай,
Бургъияту ххют шавай.

Москавлив мусил къалай,
Агьулданул дянив ттарцI,
Ина дуллу дардиран
Даруврах чув луглаву.
Нину Зинаида,
ш. ЦIуссаккул