Апрельданул 6-нний МахIачкъалалив Поэзиялул театрдануву хьунни «Дагъусттаннал халкьуннал поэзиялул, музыкалул, театрданул культуралул нюжмар» тIисса цIусса проект тIитIлатIисса мажлис.
ДР-лул Культуралул министерствалул чулуха хьхьичIмахъ лавхъуна Поэзиялул театрданул директор Елена Гьаруновал.
Хъирив махъ лавхъсса ДР-лул печатьрал ва информациялул министр Азнаур Аджиевлул барча бувна цинявппагу му ххишала дакъа аьркинсса, агьамсса проект тIитIаврищал.
Цалва ихтилатраву национал политикалул министрнал хъиривчу Роберт Аьлиевлул чIурчIав дуруна ниттил маз кIулшиврул, му лахьлахьаврил ва ябаврил масъаларттай.
Официал бутIа къуртал хьуну мукьах хьуна му проектрацIун дархIусса гьарта-гьарзасса лакрал поэзиялул, музыкалул, театрданул культуралул вечер. Мунивух чялишну гьуртту хъанай бия ДР-лул Чичултрал союзрал чулухасса вакилтал, культуралул ва элмулул зузалт, дуклаки оьрчIру, студентътал.
Мазрал аралун хас бувсса элмийсса доклад бувуна аьлимчу, филологиялул элмурдал доктор, профессор Эса Аьбдуллаевлул.
Лакрал шаэртурал шеърирду був­ккуна ЦIуссаккуллал школалул тарбиячи Багун Рамазановал хIадур бувсса дук­лаки оьрчIал.
Жул корр.