Февраль зуруй Ттуплислив «Ккавкказуллал таржумарттал къатлул» филиал тIитIин лавгсса ппурттуву, му Къатлул директор, Ккавкказуллал «Горцы» тIисса литературалул кказитрал редактор, художник Марат ХIажиевлул чIурчIав дурна гуржиял автортурал произведенияртту дагъус­ттан мазурдийн ва дагъусттаннал чичултралсса гуржири мазрайн таржума буваву дакъагу,
тайннал ва дагъусттаннал художниктурал, композитортурал, музыкантътурал ва балайчитурал дянивсса дусшиврул арарду цIакь дувансса давурттахагу зун дакIний бушиву.
ПатIимат Рамазанова
Буниялттунгу биялсса вярчIу багьну бия совет заманнай хъинну хIалану, дусну бивкIсса гуржиял ва дагъусттаннал халкьуннал дянив. Маратлун ва мунал лагма лавгун кабакьу буллалиминнан чара бакъа культуралул ламу бувансса, рувхIанийсса ирс-ххазиналийхчIин цIунилгу тайннал ва жулва миллатру гъан буллансса давурттаха чялишну зунсса гъира багьунни.
Вана апрель зурул 16-нний Ттуплислив, Гуржиял литературалул музейраву хьунни дагъус­ттаннал художниктурал выставка. Маратлул цала ва ПатIимат ХIусайновал, МахIаммад Дибировлул, Закария Закарияевлул давурттив Гуржиял хъуншагьрулий ккаккиялун дирхьунни, чIявусса агьлу бавтIунни тамаша бангу, дагъусттаннал художниктурал пагьму-гьунардан кьимат бищунгу.
«Выставкалух диялсса къулагъас дия, гуржиял агьалинан Дагъусттаннай хъанахъимуния хавар буну ччай бур, жулва халкьуннангу гуржиялмуних къулагъас дусса кунма, тайннангу Дагъусттаннай ци тагьар дуссарив, магьирлугърах цукун­сса аякьа дуссарив кIулну ччай бур», — тIий ур Марат.
ПатIимат ХIусайновалми давурттаву дур, мунил цила тIийкун, археологиялул экспе­ди­циялий ляркъусса чIю­лушиннардал биян бувсса асардайну хIасул хьусса давурттивгу. «Ххюазардахъул шинал хьхьичIрасса затру аьрщараву лякъин бюхъаврила художникнайн ва исследовательнайн гужсса асар биян бай», — тIий бур ПатIимат. «Яргсса ва тIааьнсса асар биян бунни ттуйн дагъусттаннал художниктурал давурттал, ми Гуржиял халкьуннал магьирлугърангу гъансса дур, цирив аьмсса, цалархьхьусса дур миннуву — ритмика, колорит», — тIий бур Гуржиял Художествалул академиялул архитектуралул отделениялул студентка Анна Закиашвили. Гьаннайсса, культуралул, литературалул ва магьирлугърал маз — му цинявннан бувчIайсса, цинявннан ччисса, нахIушиврул ва дакьаврил мазри, му мазрайн чул бивщуну зийгу бур, зун тIийгу бур Ккавкказуллал таржумарттал къатлул вакилтал.