Студиялуву бур Мария Ситтель ва Кирилл Клейменов
М. Ситтель: Дурусну шин хьунни жува ва студиялуву махъва-махъ хьунабавкьуния шиннай. Ва шинал лажиндарай чIявусса бувкIунни Аьрасатнал бакIрачIан. Бия санкциярдугу, навтлил багьа ялавай багьавугу, «бявкъусса дяъвилул» тагьаргу. Му дия жула уссушиврийсса миллатрал ялун ливксса хъунмасса бала-апатIрал мяъна лаласаврил шин. Жулва билаятрал хьхьичI чIявусса цIусса вызовру дацIаврил шин.
Мура чIумал жулва агьали цачIун хьунни, куннал кув бувгьунни. Аьрасатлувтурал цалва цанма бивщусса кьимат лахъ хьунни.
Жура цукунсса жаваб дулунтIиссарив вызовирттайн ва жува утти чунмай бачинтIиссарив – ми гьарзатрая хIакьину ихтилат банну ва студиялий.
ТIайланнасса эфирдануву Владимир Путиннул жавабру дуллантIиссар аьрасатлувтурал суаллахьхьун.
ДакIнийн бутанну, жул программа мукунна эфирданувун дуклай дур «Россия 24» телеканалданий ва «Маяк», «Вести ФМ», «Радио России» радиостанциярттай.
ТIайланнасса эфирдануву ур Аьрасатнал Президент Владимир Путин.
Гьашину, дукIумур эфирданух бурувгун, хъинну чIявусса суаллу бувкIун бур – цинявппагу 2 млн. 486 азарва. Миннувату 1 миллион ва 700 азаруннил ххишаласса телефондалувух оьвкуну, 400 азаруннияр ххишаласса СМС-ру.
М. Ситтель: Байбишиннув?
В. Путин: Байбишинну. Бивзрув!
М. Ситтель: Владимир Владимирович, ва дия гьарзад ина вилла бакIрайн ласун багьсса шин. Ва дия ина виятува хIукмурду кьамул бувсса шин. Вин багьуна ми хIукмурду кьамул бан ччясса мутталий. Вияр ххишала щищачIав къахьунссия ми давуртту дуван.
Ми бия антисанкцияртту, бия Минскрайсса дипломатиялул марафон, ва, гьай-гьай, Къирим.
Къабигьасса дия экономикалул тагьар. Дазул кьатIату кьюч бигьлагьисса чIумал, мунилгу тIалав буллай бия вияту вила чулухасса хIукмурду баву. Цукунсса дур шинал хIасиллу? Чув ци ххи дан бювхъур, чув чан дан багьунни? Шинал хIасиллу.
В. Путин: Му бур цила аьдатрай булай­сса суал.
Цалчин, цаппара хIасиллая ина бувсунни. Му хъанай дур Къирим, Севастополь цачIун баву, му дия захIматсса кьатIаллил экономикалул тагьардануву даву дуллалаву. Жува чIявуну бусарду, амма цIана муния аьркинссар бусан, му ларгсса шинал хьуну диркIнугу – му 2014 шинал жува ххувшаврил Олимпиадар, Сочилий хьусса КIинтнил Олимпиадалул тIуркIурдур. Ми гьарзат дукIу хьумурди.
(хъиривгу буссар)
ХIадур бувссар ХI. Аьдиловлул