Апрельданул 9-нний хьунни АьФ-лул Президентнал СКФО-райсса вакилначIасса зузи группалул заседание. Га хас дурну дия Дарбант шагьрулун 2000 шин шаврил шадлугъирттайн хIадур шаврин. Заседание дачин дурну ия АьФ-лул Президентнал СКФО-райсса полпред Сергей Меликов.
Совещание дан хьхьичI делегация лавгун бивкIссар шагьрулийсса цаппара социал ва культуралул объектру ххалбан, гай цIанасса ппурттуву буллай бур ягу реконструкция дуллай бур.
Заседаниялул хьхьичI Сергей Меликовлул унгу-унгусса дащуй бишаву дунни кIай объектру юбилейрайн хIадур баврил давурттахлу жаваб дуллалими.
«Жу лавгру цаппара объектирдайн, миннул хъуннасса мяъна дур юбилейран дакъассагу, шагьрулунгу, шагьрулул халкьуннангу. Вай объектирдал буслай бур жура циксса давуртту дурссарив ва му цукун дурну дуссарив.
Цуксса хIайпнугу, бусан багьлай бур шагьрулий шадлугъирттайн хIадур шаврин хасъсса давуртту уттигу багьайсса куццуй дайдирхьуну дакъашиву. Уттинин хIадурну бакъар Боевой Славалул парк. Щалва билаятрай дуллай бур Ххувшаврил Кьинилун хасъсса акциярду, Дарбантлив тIурча уттигу тIутIив дишинсса кIанттурду бакъар.
ЦIана аьркинссар агьали хIала буххан буван шадлугъирттайн хIадур шаврил иширттавун. Шагьрулул халкь хIала-гьуртту бувну бакъар ми давурттавун. Муния буслай бур Полпредствалийн букIлакIисса чагъардал».
СКФО-райсса полпреднал, мукунма, бувсунни Дарбантуллал администрациялул бакIчинал къуллугърацIун дархIусса тагьар лайкьсса даражалийн дуцин аьркиншиву. Цаппара замечанияртту дунни ДР-лул Строительствалул ва ЖКХ-рал министерствалийн ва ДР-лул Дуккаврил министерствалийн. Миннуяр ххишала Сергей Меликовлул аьй-бювкьу дунни Дарбантуллал цIуллушиву дуруччаврил ва дуккаврил учреждениярттал тагьарданул хIакъиравугу. Ганал тапшур бунни хасъсса министерстварттайн ва шагьрулул бакIчи Имам Яралиевлуйн циняв диялдакъашивуртту духлаган дуван.
АьФ-лул Культуралул министерствалул Кьиблалул, Ухссавнил-Ккавкказуллал ва Къиримнал округирттал управлениялул каялувчи Татьяна Селедцовал бувсмунийн бувну, цIанасса ппурттуву Дарбантлив бур ялув бацIаву дуллалисса 17 объект. Ми объектру лавсун бур федерал заллушиврулун. Шагьрулул юбилейрайннин реставрациялул давуртту дуллай бур 3 объектрай: Нарин-Къала цитадельданий ва Къалалул 2 чIирай. Ванилгу аьй-бювкьу дунни вай объектирдай дуллалисса давурттал хIакъираву. Ганил мукъурттийн бувну, аьмну ларсун, давуртту дуллай бур календарьданул графикрай ккаккан дурсса чIумал.
Зузи группалул члентурал ххалбивгьунни юбилейрайн хIадур шаву информациялул чулуха щаллу даврил, Нарин-Къалалул реконструкциялул масъалартту, мюхчаншиврул масъала, ЖКХ-лул управлениялул давурттал, волонтертал хIадур баврил, байрандалул лишан (символика) цIакь даврил шадлугъирттал давурттал план цIакь даврил ва цаймигу масъалартту.
Заседаниялул хIасиллу дуллай, Сергей Меликовлул уттигу цал увкунни, Дарбантуллал юбилей даву – му хъинну агьамсса даву душиву, мунияту чиновниктуран аьркинну бушиву цивппа шавхьсса, даву дан кIулсса бушиву ккаккан бан гьаман шикку ва цIана, ва шагьрулий. Полпреднал барчаллагь увкунни ттинин дурми давурттахлу ва чIурчIав дунни, цуксса гъан хъанай дурив юбилей, муксса чялишну зун аьркиншиву.
ХIадур бувссар ХI. Аьдиловлул
