ШИЛЛАЕВ ХIАЖИ СЯИДЛУЛ АРС
Уттигъанну, оьрмулул 90 шинаву, аьпалул хьунни НицIавкIуллал шяравасса Шиллаев ХIажи Сяидлул арс.
Увну ур ХIажи НицIавкIрав уздантурал кулпатраву 1925 шинал. Буттал шяраву байбихьулул школагу къуртал бувну, дуклай ивкIун ур Гъумучиял школалий. Дуккаву къуртал дурну махъ, Гъумучиял педучилищагу къуртал бувну, Гьущиннал шяраву учительну зий ивкIун ур. Цаппара хIаллава дуклан увххун ур МахIачкъалалив Дагъусттаннал паччахIлугърал пединститутрал тарихрал факультетрайн.
Республикалул кIулшивуртту дулаврил аралуву Шиллаев ХIажинал хъунмасса захIмат бивхьуссар. Жулва педагогтурал хъунмур никиран ХIажи Сяидович кIулссар гьунар бусса, цалва пишалул хIакьсса минахур, бюхттулсса даражалул педагог хIисаврай.
ЧIярусса шиннардий ХIажи Сяидович Буйнакскаллал педучилищалул директорну зий ивкIссар. Шикку зузиссаксса хIаллай ванал хIарачатрайну лахъ хьуссар ва дуккаврил идаралул даража.
Дагъусттаннал педагогикалул цIакьсса гьану бизаврихлу ХIажи Сяидович лайкь хьуссар СССР-данул ва РСФСР-данул «Отличник просвещения» лишандалун, ЗахIматрал ЯтIул Ттугълил ордендалун, РСФСР-данул ва ДАССР-данул Просвещениялул министерствалул чулухасса ХIурматрал грамотардан. Ва ур РСФСР-данул ва ДАССР-данул лайкь хьусса учитель.
ХIажи Шиллаевлул бивкIулул кьурчIишиву кIидачIлай, жижара буллай буру ванал кулпат ПатIиматлухь, арсурваврахь Исмяиллухь ва МахIаммадлухь, щалвагу агьлу-авладрахь.
РухI хъинний дишиннав, алжаннул ххари аннав.
Дустал, гьалмахтал
————————————————
ХIасаннул арс Закаев Сиражуттин
Апрель зурул 13-нний дунияллия лавгунни ГьунчIукьатIрал шяраватусса ххаллилсса инсан ХIасаннул ва Бахул оьрчI Закаев Сиражуттин.
Увну ур Сиражуттин 1941 шинал Хасаврай. Та чIумал ванал ппу ХIасан ивкIун ур адвокатну зий Хасаврай. 1941 шинал ппугу армиялийн увцуну, Сиражуттин ливчIун ур ниттищал Каспийскалий. Школа къуртал бувну махъ увцуну ур армиялийн Германнавун. Армиялия зана шайхту Уруватусса Катя тIисса душгу бувцуну, зий ивкIун ур тренерну стадиондалий, гания махъ, стадиондалул директорну, махъсса шиннардий зий ивкIссар санэпидстанциялий зам. главврача по хозяйственной части. Сиражуттин ия дакI-аьмал хъинсса, чIарав ацIайсса, халкьуннан ххирасса инсан.
Сиражуттин дунияллия лагаврил кьурчIишиву кIидачIлай буру арсурвавращал ХIасаннущал, Русланнущал, арснал кулпат Иращал ва душ Луизащал ва махъсса гъан-маччанащал.
Цув алжаннул ххари аннав. Сиражуттиннун къабуллумур оьрмулул бутIа оьрчIан ва махъминнан булуннав.
ГьунчIукьатIрал жямат
