Шинал лажиндарай ЦIуссалакрал райондалийсса циняв щархъаву дяъвилул ва захIматрал ветерантуран Ххувшаврил 70 шинал юбилейран хас дурсса медаллу дуллалисса лахъа-хъунсса шадлугъру най дия. Ва юбилейрацIун дархIусса, ветерантуран медаллу дуллалисса даврил ахир дунни ЦIуссалакрал шяраву.
Ххувшаву ласлай дяъвилул цIараву талай ва дяъвилул къинттуллух захIмат буллай бивкIминнан Ххувшаврил юбилейрал медаллу дуллалисса шадлугърал мажлисрай гьуртту хьунни ЦIуссалакрал шяраваллил администрациялул бакIчи Зулпукьар Рамазанов.
— ХIурмат бусса ветерантал, на хъинну ххарину ура хIакьину зу барча буван, зущал хьунаакьин увкIун. Дяъвилул цIараву зулла жаннай хIайп къаувкуну дурсса хъуннасса къучагъшиврийнур хIакьину жува Хъуннасса Ххувшаврил байран хьунадакьлакьисса. Зул чувшиврул кьимат лахъссар, та дяъвилул цIараву зу дурсса къучагъшивуртту тачIавгу хъамакъаритантIиссар, — увкунни ванал.
Ветерантал барча буван бувкIун бия ЦIуссалакрал райондалул администрациялул бакIчинал хъиривчу Ися Чергизбиев, райондалул Ветерантурал советрал председатель Мизраб Шахмилов, ЦСОН-далул каялувчи Малика Жамхатова, УСЗН-далул зузала Зарема Аьлиева. Вайннал цинявннал ветерантал барча буллалисса, миннал захIматран лавайсса кьимат бишлашисса бюххансса ихтилатру бунни.
Ветерантурал бувсунни дяъвилийгу, мунияр махъсса шиннардийгу цалва бувсса захIматрая. ДакIнийхтуну барчаллагьрай бия вай райондалул администрациялул зузалтрал цахара дуллалисса аякьалухлу.
Ва кьини юбилейрал медаль дуллунни цайнма тапшур бувсса бигарду дакI марцIну биттур буллалисса, отставкалийсса подполковник Мизраб Шахмиловлунгу. Ахирданий циняв ветерантуран дуллунни багьлул ххирасса, дакIний личIансса бахшишругу.
Оьрмулул бугьара хьуну, шиккун бучIан захIмат хъанахъисса ветерантуран юбилейрал медаллу дулун лавгунни шаппа-шаппайгу.
