Участковыйнаясса тIалавшиннарду чIяруссар

IMG_01«Дагестан» РИА-лул залдануву хьунни участковый уполномоченныйтурал даврил сакиншиннаралсса буллалисса отделданул ва балугъравун къабивминнал иширтталсса буллалисса подразделениярттал (отдел организации деятельности участковых уполномоченных и подразделений по делам несовершеннолетних) хъунама, полициялул подполковник Султан Карибовлул конференция.

А. Аьбдуллаева
Ванал бувсунни МВД-лул системалуву участковый уполномоченныйтурал хъуннасса хъар лахълай бушиву цалла-цалла участокрайсса, цайнма багьлагьисса иширттацIун, вайннал щаллу байшиву цайми подразделениярттайн тапшур бувмургу.
— ЦIанасса чIумал инсантуран участковый уполномоченныйнайн буккан багьлагьисса, участковыйнан хIала уххан багьлагьисса ишру агьалинал оьрмулуву цикссагу хъанай бур. Участковый цания ца участокрайсса Виваллил ишир­ттал отделданул вакилли. Жяматийсса низам, агьалинал ихтиярду дуруччаврицIун, участковыйтуран щаллу буллан багьайссар ГИБДД-лийн ва цаймигу службардайн багьайсса масъаларттугу. Цинявппа полициялул зузалтраву участковыйтал универсалтал кунмасса инсантал бур. Мунияту миннаясса тIалавшиннарду ххишаласса ду­ссар, — увкунни Султан Карибовлул. БувчIлай бур. Участковыйнан бакъа щин кIулссар цумур щихь цIуххинссарив, щия ци кIул бан­ссарив, хьхьичIва-хьхьичI цу ххал ан аьркинссарив.
Султан Карибовлул бусласимунийн бувну, цинярдагу ялун личин дурсса тахсиркаршивурттава 20% участковыйтурал ашкара дурсса дур.
ЧIявумур чIумал участковыйтал хьунабакьлай бур ичIура хьусса къалмакъаллащал, хIарчIун дурсса тIулдакъашивурттащал.
Султан Карибовлул бувсунни, шагьрулул агьали чIявусса бушиврийн бувну, участковыйтурайн гуж багьлай бушиву. ХIакьинусса кьини МахIачкъалалив 800 азаруннийн бивсса инсантал бур. Шагьрулуву зий ур дахьа 140 участковый.
ХIисав дарча, МахIачкъалалив зузисса ца участковыйнайн 6-7 азара инсан укIлай ур. Участокрах бурувгун, ца-ца кIанай даву чIяруну, ца-ца кIанай цахъи чанну дур.
Цайми давурттацIун участковыйнан аьркинну бур цалла участок­райсса циняр хIаятирттал, къатрал ялтту уккан. Ххишаласса къулагъасралу бугьан аьркинну бур судрахун багьну бивкIсса, условно дуллусса инсантал. Цалла участокрай хьусса гьарица иширах жаваб дулун аьркинссар участковыйнал.
Султан Карибовлул мукунма бувсунни республикалий балугъравун къабивминнацIун дархIусса тагьар цукунсса дуссарив.
ХIакьинусса кьини республикалул сияхIрай бур 800-ксса балугъравун къабивсса оьрчIру-душру. Миннаву бур тахсиркаршивуртту, тIулдакъашивуртту дурссагу. Мукунма 200 нину-ппу бур профучет­рай бивхьусса.
Журналистурал суаллахьхьун жавабру дуллай, Султан Карибовлул бувсунни цIанасса чIумал республикалий полициялул сий гьаз хьушиву, агьалинал ссавур ва мяърипат, полициялул зузалайнсса вихшала ххишала хьуну душиву. Мунияту 2014 шинал тахсиркаршивуртту, тIулдакъашивуртту чIаланну чан хьушиву хьхьичIми шиннардих бурувгун. Ахирданий Султан Карибовлул журналистурал суаллахьхьун жавабру дуллунни.