МахIачкъалаллал агьлу муданма-мудан буруккинттай бикIай шагьрулуву инсантал бигьалагансса, рахIатну щябикIансса паркру, скверду чанну бур, даврия махъ бикIу, бигьалагай кьинирдай бикIу инсантал ччан тIитIин бувну бигьалаган чун букканссарив къакIулну бикIай тIий. Мукун шагьрулул агьалинан бигьалагай кIанттурду хьун буваву мурадрайсса проект дурну дур 1-мур ЦIувкIратусса МахIаммадбаширдул арс СантIуев ХIасаннул.

Дагъусттаннал паччахIлугърал университетрал экономикалул факультетгу къуртал бувну, ХIасан зун увххун ур Дагъусттаннал Минтруд­рал республикалул жагьилтал давурттал щаллу буллалисса «Успех» тIисса центрданийн (РМЦЗ).
Та нюжмардий ХIасан СантIуев­лул «Зеленая зона» тIисса проектрал презентация хьунни Кировский райадминистрациялий. Микку гьуртту хьунни Кировский райадминистрациялул бакIчи СалихI Сагидов ва «Успехрал» (РМЦЗ) директор Заур Оьмаров.
Му даврия балжину кIул буваншиврул, на хьунабавкьура проект­рал авторнащал.
— ХIасан, вин му проект цукун дакIнийн дагьри ва та айивхьура муниха зий?
— Проектраха зунсса пикри був­ххуна ттул бакIравун МахIачкъалалив субботникрайн увксса кьини.
Шагьрулуву марцIшиву дансса мурадрай субботникрайн чIявусса агьали буккай. Ттунма хас къабизлай бия инсантал духIиндарай бигьалагансса, рахIатну ссихI ласунсса паркру, скверду бакъашиву, шагьругу Ккавкказуллал цайми шагьрурду кунма щюллишиврувун бахьлавгсса бакъашиву. Мюрщисса оьрчIру ва бугьарасса къари-къужригу ххуйну бигьалагаван аьркиншивугу хIисавравун лавсун, яъни оьрчIансса ва хъунив хьуминнансса зонардугу ккаккан буллалисса проект дуван дакIнийн багьуна. Шагьрулуву бачIвасса, пух-пусурданухьхьун лавгсса кIанттурду ххалбувну, микку щюлли зонарду дувансса проектри ттул даву. ОьрчIансса площадкарттугу бувну, баскетболданий ва футболданий буккайсса площадкартту бикIу, цайми спортрал тIуркIурдансса ягу укуннасса дялахърулунсса площадкартту бикIу. Гьарца участокрай хъуни бакъасса фреш-бардугу бишинтIиссар, къулайсса конструкциярду дусса.
Инсантал ххуйну бигьалаган шайсса шартIру дузал дарча, шагьрулул бюджетравун налогругу дачинтIиссар.
Гьаннайсса, на ттулла проектрая бувсъссия «Успехраву», миннал кумаг бунни проект тIайлану хIасул дуван, миккусса специалистътуралгу, Кировский райадминистрациялийгу проект хъинчулий ккарккунни.
— Шагьрулий 3 район дунура, ляличIину Кировский администрациялийн циван увкра му проектращал?
— Минтрудрал ва Кировский райадминистрациялул цачIусса мероприятиярду дикIай, мукун Кировский райадминистрациялул субботникру дай цалла райондалий. Нагу ми субботникирттай гьуртту хьура, хIисав хьунни бигьалагай кIантту чанну бушиву. Масалдаран, Громовлул цIанийсса кIичIиравусса паркраву. Мунияту на пикри бав Кировский райадминистрациялийн дулун ттулла проект ххалдигьин, миннан цукун дизайрив ккаккан.
— Проект анжагъ Кировский райондалийннив дагьлагьисса ягу щалвагу шагьрулийн?
— Цалсса Кировский райадминистрациялийн. Амма ттул умуд бур так му райондалий гьашиву къадурну, щалвагу шагьрулуву дулланссар агьалинан хайр-мюнпатрансса давурттив, миннувух ттулламур проектралгу ххуллу ласунссар тIий ура. Зунмагу чIалай бур шагьрулуву ша бизансса кIану личIавай бакъашиву, ча-чунгу стройкарду най душиву. Агьалиния так къат­равун бувххун ялапар къахъанан­ссар. Миннангу кьатIушав буккан аьркинни гьавалийн, бигьалаган, цIуллу-сагъшиврул ялув бацIан. Мунияту бачIвасса, ччюрклил бакIурду бувсса кIанттурдай щюллисса паркру булларча, мунийну агьалинан хайрди хьунтIисса, ми паркирдайн, сквердайн къаршийну сукку хьумигу къабуккантIиссар. ЧIарав ххуйсса парк бушаврия щинни зарал? Шагьрулул оьрму хьхьичIунмай хъит учин байссагу мукунсса паркирдалли, щюллисса сквердалли.
— ТIайлабацIу баннав вин, ХIасан! Бартдигьиннав шагьрулул хъуниминналгу вил проект. Буниялттунгу халкьуннан аьркинсса ва къулайсса проект. Инава тIийкун, хIакьину жулва шагьрулул хъунмур диялдакъашиву дур мукун­сса проектру дакъашиву.Кабакьиннав шагьрулул администрациялул ина дуллалимуницIун, вил проектру бакIуйн дуккан дуваврицIун.
Ихтилат бувссар
ПатIимат Рамазановал