Ларгсса нюжмардий ХIукуматрал къатраву, ДР-лул БакIчиначIасса Хъунисриннал советрал сакиншиннаралу, хьунни Республикалул Верховный судрал председатель Руслан Мирзаев гьурттусса батIаву. БатIаврий гьуртту хьунни Хъунисриннал советрал вакилтал, Верховный судрал пишакартал ва СМИ. Мукунма шиккун эксперт хIисаврай оьвкуну бия Юридийсса элмурдал доктор, профессор Хасбулат Рустамовлуйн.

З. АьбдурахIманова
БатIаврил мурад бия халкьуннал оьрмулуву хъанахъи­сса хIакьинусса дахханашивурттаву судрал къуллугъир­ттал цуксса агьамшиву ххисса кIану бугьлагьиссарив ва къуллугърал дачин дурсса даврил биялалуву цуку-цукунсса масъалартту цIанасса ппурттуву буссарив бусан.
БатIаву дачин дурсса ДР-лул БакIчиначIасса Хъунисриннал советрал хъунама Аьбдулла МахIаммадовлул кIицI лавгунни, республикалул бакIчинал гьарцагу аралул каялувчитурал хьхьичI бивхьусса масъаларттаву ца яла агьаммур халкьуннал оьрмурду рахIат бавриха, къулай буллалавриха зун аьркинмур масъала бушиву.
— Дагъусттаннал каялувшиннарал амрурду ва хIукмурду давурттайн ва иширттайн кIура баен баврил чул бувгьусса жул Совет хъанай бур маслихIатрал ва экспертрал институт. Бувар ттигу халкь гьарцагу аралия, хIакьинусса оьрмулул тагьардания рязий хьун. Бур ттигу бакьин бансса гъалатIру, дур дансса чIярусса давурттив. Вай иширттал ялув бавцIуну, вайннул хъирив багьну буссар Советрал вакилталгу, — бувсунни Аьбдулла МахIаммадовлул.
Ванал бусаврийну, ва даврил ххуллий хьхьичIва-хьхьичI байбишин багьлай бусса бур судрал даврия. Цанчирча рес­публикалул судирдал биялалуву дуну тIий халкьуннал властьрайнсса вихшала ва умуд бишаву.
— ХIакьину инсаннал пикри-зикри хIасул буллай бур халкьуннал дяниву гьаз буллалисса ихтилатирттал, Интернетрал, СМИ-рдал.
Кьунияхъайсса шиннардий личIи-личIисса трибунардая жунма баллай бур тIайламунил, хIакьмунил хIакъиравусса ихтилатру. Иширайну халкьуннал дяниву гьаз байми ихтилатирттая ятсса кунмасса ихтилатирттан ккаллигу бувай, — увкунни Советрал хъунаманал.
Аьбдулла МахIаммадовлул мукъурттийн бувну, Аьрасатнал «Независимая газета» кказитрал гьашину апрельданий дурсса цIухху-бусавриву гьуртту хьусса, судирдайн бувксса халкьуннал 45 процентрава 31 процент инсантурал кIицI лавгун бур, судру лулттурасри ласлай, тIайлашиву къадуручлай зий бушиву. Вайннува 27 процент халкьуннал кIицI лавгун бур законодательствалул диялдакъашивуртту душиву, 25 процент судирдал чIярусса давурттив дуну тIий цалла даву низамрай дан къахъанай бушиву, 22 процент халкьуннал кIицI лавгун бур властьрал чулуха судирдайн ялунбигьайшиву, 10 процентрал тIурча бувсун бур низам дуруччай органнал чулуха ялунбигьайшиву. Жулла республикалий укунсса журалул цIухху-бусаврил хIасиллу дакъар.
Шикку Руслан Мирзаевлул балжину бувсунни цив мудангу хIадурну бушиву тIивтIуну, халкьуннал мурадру буручлай зун. Гьарта-гьарзану бувсунни махъ шиннардий республикалул судирттал дуллалисса давурттая. Ванал бусаврийну, вай махъсса шиннардий судрал системалуву хьуну дусса дур ххуй чулиннайсса чIярусса да­хханашивуртту. ДР-лул Судрал председательнал кIицI лавгунни, судрал хIакъираву ттинин халкьуннал кIулшилуву хIасул хьусса щак-щуксса пикрирду ххиен бавриха ва миннал цайннасса вихшала цIакь даврил ялув республикалул судрал щаллагу система зий душиву.