Щалва дяъвилувухгу увккун, та аждагьалул цIаравату сагънугу ливчуну, аьрай дирну диркIсса щавурдал лахъи лаган къаивтун, оьрмулул 32 шинаву аьпалухьхьун лавгссар ттул буттауссу Исяев ХIасан. Амма му кутIасса оьрмулий мунал дурцири чувшивуртту, бувцири хъинбалартту хъамабитан хьунсса бакъассар.

Тернополь шагьрулий хьусса оьсса талатавриву ХIасан хIаласса жулва саллатIнал хъуннасса кьюкьа немецнал ппив дурну, сагъну ливчIун ивкIун ур учинагу 2 инсан – ттул буттауссугу, ца оьрусгу. Ми кIинналвагу хъирив бивчуну бур немецнал ккаччащалсса саллатI. Тай цивппа немецнаяр, ми авчаркIарттаяту дикIайва тIар жулва аьскартуран нигь – тайннул инсан ппив-ххив увну кьаитай­сса ивкIун ур. Хьхьунил чIумал, ккаччан щуркIал къахьуншиврул, цумурдив ца неххавун бувххун, най бивкIун бур, так ссихI ласун бакъа, ялунгу къаличлай. Мукун ххассал хъанай най, ххуллийх 3 гьанттагу хьуну, ахиргу, кIиягу бивну бур жуламинначIан.
Амма, му къагьану, валлагь зу немецначIан лавгун бивкIссару, акъарив зу сагъну къаличIайссияв тIий, бувцуну дуснакь бувну бивкIун бур. Яла гьарзадрал хъиривгу лавну, хьумур мяйжан бан бювхъуну махъ, ми итабавкьуну бур. МуницIун тас­ттикь хьуну бур миннал кIинналлагу му базилух дурну диркIшиву хъуннасса виричушиву. ХIатта дур­ккун дур кIиннаннагу наградартту: оьруснан дуллуну дур Лениннул орден, буттауссин – ЯтIул ЦIукул орден. Мукунсса орден ХIасаннул 2 дуссия. Аьрая кIура авсса чIумал, мунал дия капитаннал чингу.
ТачIав хъамабитан къахьунссар ччяни нитти-буттацIа хьуну бивкIсса ттунгу, ттул уссин АхIмадханнунгу ХIасан-буттауссил бувсса ка-кумаг, чIарав ацIаву. Муналъяв жу чивун буккан бувсса.
Оьрмулул ва талатаврил яхIлув ияв ина, жул аьзизсса буттауссуй. Жун хъунмасса талихIну хьу­ссар ина жул оьрмулуву ивкIшиву. Жувугу, жул оьрчIавугу тачIав духкъалагантIиссар вия ларсъсса эбрат, къирият. Вил бунагьирттал аьпа баннав, вил рухIиран кIу бизансса зат загьир къахьуннав тачIав агьлу-авладрай.
Цала чIивима уссу Нуруллагьлущалсса ва сурат ХIасаннул рирщуну дур 1943 шинал Грозналлал шагьрулий. Му ппурттуву тиккусса госпитальданийн агьну ивкIссар щаву дирсса буттауссу. Тиккун танах уруган лавгун ивкIссар Нуруллагь. Мукун нанисса хавар бавукун, Къичурлухиял шяраваллил хъаннил, ца гьантлул мутталий дурну-щарщун ттуршунния лирчусса катIри ва жуларду, гьан дурну дур ссайгъатран ХIасаннунгу, ХIасаннущал аьрай талатисса аьскартурангу. Суратрай чIалачIи дурну дур Нуруллагьлул ХIасаннухьхьун дуллалисса катIригу, ХIасаннул Нуруллагьлухьхьун буллалисса «Зана хьунну ххувшаврищал» тIисса чагъаргу.
Амирханхъал Ися,
ш. Къичурлухи