ЦIана яла чагъираву, мартрал 16-нния шиннай, Дагъусттаннал паччахIлугърал университетраву най дур аьдатравун дагьсса «Студенческая весна – 2015» студентътурал гьунардал смотр-концерт. Сессиялия сессиялийн яхъанахъисса студентътурал яла тяхъамургу, хIазмургу чIун инттухунмай ва шадлугърайн хIадур хъанахъимур чIун дикIай.
Залму АьбдурахIманова
Апрельданул 6-нний ДГУ-рал хъунмур залданул сахIналий цалва балай учаврил, къавтIун бизаврил, хъярч-махсара баврил, назмурду дуккаврил гьунарду ккаккан бунни ттунмагу ххирасса филологиялул факультетрал студентътурал.
Университетрал хъунмур залданувун, инсан щяикIан кIану бакъа, бувкIун бия студентътал, филологиялул факультетрал каялувшинна ва преподавательтал. Вайннавух хIакьинунингу хIурматрайсса ттулва преподавательтал ххал шавриягу ттун дия кIилийнусса ххаришиву.
1-2-ми курсирдай дуклакисса студентътурал сахIналий ккаккан дунни миллатирттал ва уттизаманнул къавтIавуртту, щаллу бунни табасараннал, даргиял, яруссаннал, оьрус мазурдийсса балайрду ва бувккунни студентътурал цалва ляхъан бувсса шеърирду. Мукунна, хъинну сивсуну, смотр-концерт цала хъярч-махсарарттайну чIюлу дунни филологиялул факультетрал КВН-далул командалулгу.
Халкьуннаву филологиялул факультетрайн душру гьарзасса буну «факультет невест» учайхьувкун, къулагъас къадурну къабивтунни мода ккаккан даврил бутIагу. Студенткахъал шикку ккаккан дан хIадур дурсса лаххи-ликкиягу дия уттизаманнуха лархьхьусса, креативныйсса. Лаххи-ликкия жува аьдатсса махмурдания, читлия, бумбархатрая ягу мучIая дурурххусса дакъаяча, ттучаннаву жура машан ларсмур дишайсса пакетирттая, балайрдал дискардая, чагъардания, кказит-журналлая дурурххусса, махIаттал бувансса дия.
СахIналий хъанахъимуниха лавхьхьуну, гурсса хъатру ришлай, гьарцагу номердания рязийну бия залданувусса тамашачиталгу.
Факультетрал 1-2-ми курсирдал студенткахъал хIадур дурсса Яруссаннал къавтIавриву гьуртту хьусса ДучIиннал шяравасса Оьмарова Асиятлул бувсунни, гьарцагу гьурттучи сахIналийн ккаккан дансса программалуву дакIнийхтуну, жаваблувну гьуртту хьушиву. Бувсунни цивппа ва къавтIаврийн ччянияцIава хIадур хъанай бивкIшиву.
— Укун цачIу хIадур дуллалисса шадлугъирттал студентътал ца кулпат кунма цачIун бувну, жул дянивусса дусшиву цIакь дувай. Хъинну ххаринугу бура навагу университетрал, ттула аьзизсса факультетрал оьрмулуву гьуртту хьун бюхъаврия.
ЧIа тIий бура жулва факультетран вайми факультетирттал дяниву хьхьичIунсса кIанайн бувккун, филологиялул факультетрая цинявннал эбрат ласлан, — увкунни Асиятлул.
Асият, ххуйсса кьиматирттай Гъумучиял лицейгу къуртал бувну, дуклан бувххун бур филологиялул факультетрайн. Ва цуппагу бур жуна цинявннан бусравсса, лакрал литературалуву, прозалуву хъунмасса бутIа бивхьусса чичу Зиявуттин Айдамировлул душнил душ.
Асиятлун ва ванищал архIал сахIналийн бувксса филологиялул факультетрал студентътуран чIа тIийгу бура «Студенческая весна -2015» ДГУ-лул конкурсраву ххув хьуну, республикалул циняв вузирдал дяниву хьунтIисса конкурсрай хьхьичIунсса кIанттун лайкь хьун.
