Жула машгьурсса шаэр Расул ХIамзатовлул «Гьунттий ттул маз бухлагантIий бухьурча, хIадурссара на хIакьину ивчIан» тIисса мукъурттилу хьунни уттигъанну республикалул школардай ниттил мазурдин хасну дурсса чIяруми олимпиадартту, конкурсру ва элмийсса батIавуртту. Вай мероприятиярдаву чялишсса гьурттушинна дунни лакку мазраха зузисса учительтуралгу, ниттил мазрах гъира бусса лакку оьрчIалгу.

Залму АьбдурахIманова
Хаснува хъинну ххуйсса ниттил мазран, лакку аьдатирттан, культуралун, тарихран хасъсса машгьурсса жулва чичулт ва шаэрталгу гьур­ттусса чIярусса конкурсру, олимпиадартту дунни лак цIусса минардайн бизлазисса Новостройрал школардайгу.
«Лаккуй бувсса ва Лакку кIанай хъунма хьусса буну тIийрив къакIулли, ттул дакI аьзизсса ттула буттал шяравун ЦIуйшав кIункIу тIун дикIай», — тIий буслай бур ттухь февральданул 20-нний Республикалул Шеърирдал конкурсраву ххув хьусса цIусса миналийсса Новолакуллал школалул 11-мур классраву дуклакисса Исяева Анжела. Ваниннин хьхьичI ЦIуссалакрал райондалий хьусса конкурсрай Анжелал лакрал шаэр Мирза Давыдовлул «ДакIнийрив вин, дадай?» тIисса назму пасихIну, дюхханну дурккуну, бувгьуну бур 1-мур кIану. Гичча ва тIайла бувккунгу бур республикалулмур конкурсрайн. Анжелал, пасихIну назмурду дуккаврицIун, бур цилагу шеърирду чичайсса пагьму-гьунар. Цуппа гьуртту хьусса кIирагу конкурсрайгу ванил дурккуну дур Лакку улклун, цинма ххирасса ЦIуйшиял щарнин хасну чивчу­сса шеърирдавасса «Буттал кIану» тIимур. Республикалулмур конкурсрайн миллатрал лаххи-ликкиялуву буккаврилгу Анжелал гьурттушинна ялунгу ххуй дурну, сий лахъ дурну дур.
— Ттун хъинну ххирар жулва миллатрацIун дархIусса цимурцарагу: янна-ус дикIу, миллатрал дукра-къяс бикIу, буттахъал аьдатру дикIу. Гъирарай дутара бакIрайнгу ттулла ниттил ниттия дирсса лачак дикIу, чалагъай дикIу. Конкурсрайгу ца нава бакъа къабивкIун тIий миллатрал янналуву ва бакIбахIулуву, дакI дарцIуну буссияв цания ца хьхьичIунсса кIану бугьаншиврийн. ТалихIиннаран, 1-мур кIану бугьав. Конкурсрай на бакъасса лакрал чулуха ялагу ия 6 гьурттучи. Ряхагу ия хьхьичIунсса кIанттурдан лайкьсса. Гиккугу райондалул конкурсрай бувккусса Мирза Давыдовлул шеъригу бувккуну, нара ляхъан дурмур наз­мугу дурккуссия. Муниягу жюри хъинну рязийну ливчIуна, — тIий бур Анжела.
Ванил ниттил мазрахмур гъирагу, ччавугу нахIакьдансса дакъар. Гихунмаймур цилва оьрмугу Анжела бахIин ччай бур лакку маз лахьхьаврищал, лакку мазрал дарсирдал учительнал пишалущал.
Вай хьхьичIуннайшивурттан лайкь хьун Анжелан хъунмасса кумаг бувну бур Новолакуллал школалий ванихь лакку мазрал дарсру дихьлахьисса Айдиева Анисат Аьлаевналгу. ЦIана цуппа зузисса школалийн бучIан хьхьичI, ДГУ-гу къуртал бувну, ва зий бивкIун бур цила буттал шяраву ГьунчIукьатIув. Новолакуллал школалий Анисат Аьлаевна зий кIилчинмур шин хъанай дур. Дахьва-дахьва цIусса кIанай кIанттул хъанахъисса ванил хъунмур мурадгу бур дуклаки оьрчIавун жулва мазрах, литературалух, лакрал тарих, багьу-бизу, тIул-тIабиаьт хъамадитулул хьун къариртун, гъира бутан, миннухсса ччаву гужлан дан.
— Бюхъу-хIарачат бусса, лакку мазрах хъуннасса къулагъас дусса Анжела кунмасса дуклаки оьрчIру – му лакку мазраха зузисса, лакку мазрал пишакартал хIадур буллалисса дуккаврил заведениярттал бахтти-талихIри. ХIасил школа къуртал бувкун, Анжелал цила гихуннайсса дуккавугу лакку мазрал факультетрай дуллан тIий бухьувкун. Укунми абитуриентътурах миннал чулухасса къула­гъасгу дикIанхьуви тIисса умуд бур, — тIий бур Анисат Аьлаевна.
Республикалул конкурсрай лавсъсса 1-сса кIанттущал барчагу буллай, цIусса миналийсса Новолакуллал школалул цIа хьхьичIуннай дуван ца шаттирал бухьурчагу хIарачат буллалисса Анжелан ва ванил учительница Анисат Айдиеван чIа тIий бура цIуллушиву ва гихунмайсса оьрмулул ххуллий тIайлабацIу ва ваниярдагу хъуни-хъунисса хьхьичIуннайшивуртту.