Апрель зурул 14-нний МахIачкъалалив Нураттин Юсуповлул цIанийсса республикалул ОьрчIал библиотекалуву хьунни уттигъанну оьрмулува лавгсса, машгьурсса лакрал чичу, прозаик, Буттал КIанттул цIанийсса Хъунмасса дяъвилул ветеран Мудунов Абакар Аьлиевичлул творчествалун хас дурсса аьпалул вечер.

И. Саидова
Шиккура хьунни шаэрнал махъва-махъ чивчусса «Къучагъ» тIисса оьрчIансса хавардал лу­ттирал презентация. Ва кьини дуклаки оьрчIахь шаэрнал оьрмулия, творчествалия ва дяъвилул ххуллия бусан бувкIун бия ДР-лул Чичултрал союзрал председательнал хъиривчу, шаэр, таржумачи, публицист Марина АхIмадова, «Истоки вдохновения» тIисса чIава шаэртурал творчествалул клубрал каялувчи, шаэр, прозаик, публицист Космина Исрапилова, шаэрнал душ Гьидаят Мудунова ва ванил душ ПатIима Шамильевна, шагьрулул школардал ниттил мазрал дарсирдал учительтал, дуклаки оьрчIру ва библиотекалул зузалт.
Шаэр дакIнийн утлатисса вечер дачин дурну бия Абакар Мудуновлущал гъанну кIулну бивкIсса, мунал творчество хъинну ххирасса Исрапилова Космина МухIуттиновна.
— Ххирасса оьрчIрув, хъамал! ХIакьину жува цачIун хьуну буру машгьурсса лакрал чичу, шаэр, публицист, халкьуннал просвещениялул зузала, ГьунчIукьатIату­сса Аьлил арс Абакар Мудунов дакIнийн утан. Апрель зурул 15-нний Абакар Мудуновлун хьунтIиссия 97 шин. Амма, цуксса хIайпнугу, Ххувшаврил юбилейгу хьунакъадаркьунна, гьашину февраль зурул 26-нний ххаллилсса шаэр Абакар Мудунов лавгунни жулва оьрмулува.
Шаэрнал творчествалуву чансса бакъар оьрчIансса произведенияр­ттугу. Мунияту пикри хьунни жун ванал творчествалул вечер зущал архIал дуван. Ччива зу шичча лавгун шаэргу хъиннува ххира хьуну, ванал творчествагу хъиннура куртIну кIул хьуну.
Абакар Мудуновлул оьрмулу­цIун бавхIуну бур миллатралгу, билаятралгу оьрмулуву хьу­сса агьамсса ишру. Увну ур шаэр 1918 шинал апрельданул 15-нний ГьунчIукьатIрал шяраву. 1936 шинал Гъумук педучилищагу къуртал бувну, зун ивкIун ур учительну. Сайки щалва оьрмугу му пишалий зий лавгун бур. Мудунов бара хьуну ур шяраву социалист низам дузал дуллалисса чIумулгу, гьуртту хьуну ур Буттал КIанттул цIанийсса Хъунмасса дяъвилувугу. Дяъви къуртал хьуну махъ зий ивкIун ур партиялул ва печатьрал даврий. Ванал чивчумур бур вих хьунсса, хъунмурчIин цанма ккавкмуниясса. Ва чичлай ур шяраваллил жяматрал оьрмулия, шяраву хъанай бивкIмуния. Ванал романнаву ва кьиссардаву ккаккан дурну дур революциялул ва граждан дяъвилул суратру. Абакар Мудуновлул маз ляличIинува авадансса ва пасихIсса бур. Мунал жулла литературалуву багьа бищун къашайсса ххазина кьабивтун бур. Цува дунияллия гьаннин кьабивтсса махъва-махъсса ванал лугу «Къучагъ» тIисса бур. ОьрчIрув, жулва оьрмулуву ва кунмасса шаэртал хъинну чансса буссар, жура ванал творчество кьадрулий дуруччин аьркинссар, — увкунни Космина Исрапиловал.
Хъирив ихтилат бунни Дагъус­ттаннал Халкьуннал шаэр Марина АхIмадовал:
— Абакар Мудунов дагъус­ттаннал шаэртураву ттун хъинну бусравсса ва ххирасса икIайва. Цуя ца чичу ваная щилтагъсса махъ тIий ттун тачIав дакIний акъар. Ххирая ванал творчество халкьуннангу, жун, чичултрангу. Ванал ляличIину пасихIсса ва авадансса мазрал цинявппа хIайран байва. Укунсса инсантурал узданну ва марцIну бувтсса оьрму цинявннан эбратну бикIан аьркинссар. Ваналгу, та чIумалсса оьрчIал куннасса, захIматсса оьрчIшиву диркIссар, ккаркссар ванан дяъвилул лажингу, дяъвилия махъсса захIматсса шиннугу. Ва цалва яхI-къирият, ас-намус лавайсса даражалий буруччаврийну бусрав хьуссия халкьуннан. Абакар Мудунов ххаллилсса педагоггу ия. Ванан хъинну ххирая оьрчIру. ДакIнийхтунусса, иминсса проза ва шеърирду чивчуссар ванал оьрчIан хас бувссагу. Абакар Мудуновлул жунма кьабивтссар багьа бищун къашайсса творчествалул ххазина. Ва шаэр мудан жулла дакIурдиву личIантIиссар. Жу пикрилий буру гихунмай ванал оьрчIан чивчусса ххаллилсса шеърирду оьрус мазрайнгу таржума бан, — увкунни Марина АхIмадовал.
Ахирданий, цила ппугу дакI­нийн увтун, ванал творчествалун лавайсса кьимат бишлашисса мажлис сакин бувминнахь ва цинявппа гьуртту хьуминнахь барчаллагь увкунни Гьидаят Абакаровнал.
Шагьрулул школардал оьрчIал дурккунни Абакар Мудуновлул чирчусса назмурду ва дяъвилуха цалла ляхъан дурсса назмурду. Шикку гьуртту хьусса цинявппа оьрчIан пишкаш бунни Абакар Мудуновлул цIуну итабавкьусса «Къучагъ» лу.