Сайки 7 шин хьуну дур жулла республикалий «Единая Россия» партиялул председатель Дмитрий Медведевлул приемная зий. Нюжмардий 3 кьини ДР-лул Халкьуннал Мажлисрал депутатътурал ва приемныйлуву зузисса ПаччахIлугърал Думалул депутатътурал кумагчитурал кьамул бувай шикку личIи-личIисса масъаларттащал бувкIсса инсантал.
Миннал буруккинттах вичIигудирхьуну, ми масъалартту щаллу бан аьркинсса идарарттайн буккай. Бюхъай шиккун бувкIсса инсантурал цинявннал масъалартту щаллу къашайсса бикIангу, амма цагу, кIиягу инсаннал буруккин буккарча мугу хъунмасса иш бур.
А. Аьбдуллаева
Тталат кьини шикку жямат кьамул буллай ия ЦIуссалакрал райондалул агьалинал увчIусса, ДР-лул Халкьуннал Мажлисрал депутат Зайнулла Мирзоев. ВаначIан буххан бавцIумигу чансса бакъая.
Шикку щябивкIсса ца-кIира ссятрал дянивгума чIалай бия цукунсса масъаларттащал хьунабакьлай буссарив жулва инсантал, цукунсса дуссарив миннал багьу-бизулул, ичIаллил тагьар. Ва кьини шиккун бувкIсса инсантураву бия цалла къатри дакъа лаякъатрай яхьусса, къатри дан аьрщарал парча ччисса, бия къума-цIансса къатраву кIива-шанма кулпат яхъанай буну, ялапаршиннардил шартIру къулай дан кумаг бувара тIисса. Бия цIуллу-сагъшиврул тагьардануцIун бавхIусса буруккинтту буссагу.
Къарабудахккантуллал райондалия бувкIун бия чувчIав къазузисса, школалий дуклакисса 3 оьрчI бусса Бианат Аьвдулвагьабова. Ванил адамина, эпилепсиялул къашавай аьралуннава комиссовать увну ивкIсса, цIанагу цIуллу-сагъшиврул тагьарданийн бувну, чувчIав зун къахъанахъисса ур. Ванил тавакъю бия дачарду дусса кIанай аьрщарал парча булара тIисса. Депутатнал тапшур бунни кумагчинайн, Къарабудахккантуллал райондалул бакIчинайн бувккун, ва кулпатран аьрщи дулунсса чаран лякъира учин.
Буйнакскаллал райондалийсса Ялувмур Жунгутайлив ялапар хъанахъисса хъамитайпа гепатит С азар дусса бур. Ванил 5 оьрчI бур. ЧувчIав зий бакъар. Ва азар хъин дан аьркинсса даруртту хъинну ххирасса бур. Ми ласунсса каши ваничIа дакъар. Мушакъатшиврул группа бан хъирив буклай, бан бюхълай бакъар.
Оьрмулул 25 шинавусса Мариям, цаннан 6, цаннан 3 шин хьусса, кIива мюрщисса оьрчIащал лаякъатрай ялапар хьуну бур. Лас вайгу кьабивтун ливхъун ур. Мариямлун му чув уссариввагу кIулну бакъар. ОьрчIру кьабитансса кIану бакъа, ванища чувчIав зун хъанай бакъар. Бувгьусса къатлух, цанна аьркинмуних дулунсса арцу дакъа ливчIун бур.
Мариямлул тавакъю бур оьрчIру садикрайн бакьин кумаг бувара тIисса. Ванил масъалалул хIакъираву депутатнал МахIачкъалаллал КIулшивуртту дулаврил управлениялийн запрос гьан дунни.
Хъунзахъиял райондалиясса Нуцалай МахIаммадовал тавакъю бур Буттал КIанттул цIанийсса Хъунмасса дяъвилий талай ивкIсса буттал документру бакъа хьуну буну, му дяъвилул участник ивкIшиву тасттикь бан кумаг бувара тIисса. Вайннал бутта дяъвилий ивкIшиву буслай ур ванащал архIал увцуну ивкIсса Шейхали Мусаев. Нуцалайл ниттин 87 шин дур. Кулпатрал ахIвал кIюласса бур, яхьуну бур захIматсса шартIирдай. Буттан дяъвилул участникнал статус ласун бюхъарча, вайннал ниттин участникнал кулпат хIисаврайсса куклушиннарду хьун най дур, ва ялапаршиннарал шартIру ххуй дан субсидияртту ласунсса сияхIрай дишин най бур. Ва хъамитайпа кьамулгу бувну, ванин кумаг бува учин депутатнал оьвкунни ДР-лул аьрали комиссар Даитбек Мустапаевлуйн.
Вай личIи-личIисса буруккинттащал бувкIсса инсантал кьамулгу бувну, миннал бусласимунил мяъна-мурадгу лалавсун, Зайнулла Нуруллаевичлул цаппара масъаларттал хIакъираву гацIана оьвкунни миннулсса бан аьркинсса идарарттайн ва къуллугъчитурайн, цаппара масъаларттал хIакъираву маслихIат ккавккун, ми ххалбигьин аьркинсса идарарттайн чагъарду гьан бансса пикри хьунни. Жямат кьамул бан ссят 10-нния ссят 13.00 хьуннинсса чIун ккаккан дурну дунугу, шиккун бувкIсса цинявппа инсантал кьамул къабувну къалавгунни Зайнулла Нуруллаевич.
Ва кьини приемныйлувун бувкIсса инсантурахьхьун миннал масъалартту ссайн бувкссарив жаваб дулунтIиссар зурул дянив. Депутатътал хIала бувххукун, ми масъалартту цаппарасса бунугу щаллу хьуншиврийн вихшала дур.
