Хъинну ххуйну най дур Ккуллал райондалий Ххувшаву ларсун 70 шин шаврин хас дурсса давуртту. Вана апрельданул 17-ннийгу райондалул жагьилтал, дуклаки оьрчIру лавгунни Щуну-Зунттул ца бакIрайн Ххувшаврил бунияласса Ттугълил копия бищун.
ХIажимурад ХIусайнов
Ттугъ бищавривух гьуртту хьун ччими бавтIуна райондалул Досуговый центрданул чIарав. Шикку кутIасса ихтилат бувна Ккуллал райондалул бакIчи Сулайманов
Сяидлул. Ванал кIицI бувна Щуну-Зунттул бакIрайсса кьасса ар хъанахъишиву Европанавусса зунттавусса яла лахъмур, мунийн бувну жагьилтурал ттугъ бищун нанисса ва даву хъанахъишиву Хъун дяъвилий жанну кьурван дурсса чиваркIуннал цIарду абад дуллалисса ишну. Гьай-гьай, Щуну-Зунттуйн лахъан бигьану къабикIантIишивугу кIицI бувна. Сяид ХIасниевичлул кIицI бувна, мукунма, цIана марххала басласисса чIун духьувкун, хатIа, апатI къахьун, мугъаятну бачин аьркиншиву, ялавай бучIайхту, Щуну-Зунттул ухнилу хьунабакьинтIишиву.
Машинартту гьан бюхъайсса кIанайн биян бувна зунттуй ттугъ бищун нанисса гьурттучитал – цинявппагу 150-ннийн бивсса инсантал. Дурусну ссят 9-нний бавчуну, Щуну-Зунттул ца мицIлийн бияннин хьуна дурусну 3 ссят. Жагьилтал бакъассагу, Щуну-Зунттуйн лахъавриву гьуртту хъанай бия Хъусращиял, Ккуллал, 1-мур ЦIувкIуллал, СумбатIуллал, Ваччиял, ЧIяйннал, Къяннал школалул оьрчIру. Зунттуйн лахълахъиминнащал бия полициялул зузалтгу: ХIаммакуев Рамазан, АхIмадов АхIмад, Оьмаров Рамазан, Аьлиев Заур, Оьмаров ХIусайн, Кьадинаев Малик, АьбдурахIманов АьбдурахIман. АпатI хьурчагу, аьркинмунищалсса къуршилущал ия хIакин Абакаров Камил. Ванал ярагъуннива ишла дурна анжагъ ца носилка, хъинну увххун, ачин къахъанахъисса оьрчI уцин.
Щуну-Зунттуйн лахъаврий каялувшиву дуллай, ялув бавцIуну бия МЧС-рал хъунама Кьурбантаев Аьжуб, СумбатIуллал школалул учитель Сулайманов МахIаммад, КIулшиву дулаврил управлениялул зузала Оьмариев Жамалуттин, Спорткомитетрал бакIчи ХIажиев Арсен, Жагьилтурал комитетрал бакIчи Чаринов МахIаммад. Ттугъ бищавриву гьурттушинна дуллай, суратру ришлай бия Ккуллал райондалул администрациялул иширтталсса бувайсса отделданул хъунмур МахIаммадова Надежда.
Ттугъ бивщуну зана хьуну махъ, зунттул ухнилу тIивтIуну бия ссупра. Муних Сулайманов Сяидлул барчаллагь увкуна ва давривух гьуртту хьусса гьарца каснахь.
— Укун Ватан ххирасса жагьилтал жула дянив бусса чIумал, оьрмулуву хьунадакьлакьисса захIматшивуртту лахъан бюхъантIишиврул умуд бур ттуву, — увкунни ванал.
Га кьини хьуна Ккуллал райондалул жагьилтурал цаннал гаманах аякьа, хIурмат буллалисса, дакIурдил гъилишиву кIидачIлачIисса кьинину. Яраппий, я Аллагь, ва гъилишиву тачIав жулла дакIурдива чан къахьуннав.
