КIулсса куццуй, ва шинал ахирданий Парижлив Дагъусттаннал культуралул ва Дарбантуллал Кьинирду дуван хIадур хъанай дур жулла республика. ЧIун-чIумуй хъанай дур му иширан хас дурсса батIавуртту. Апрельданул 2-нний ДР-лул Культуралул министерствалуву хьунни мукунсса ирглийсса батIаву, ДР-лул культуралул министр Зарема Буттаевал каялувшиннаралу.

Ва совещаниялул давривух гьуртту хьунни ДР-лул культуралул министрнал хъиривчу, Республикалул Халкьуннал творчествалул къатлул директор Марита МухIадова, Лакрал театрданул художествалул каялувчи Бадрижат МахIаммадхIажиева, Оьруснал театрданул директор Тимур МахIаммадов, «Дагестан» РГВК-лул арт-директор Ариза Батирова, художник Ибрагьим-Халил Супиянов ва цаймигу.
Зарема Ажуевнал бувсунни лавгсса зурул дайдихьулий ва иширан хасну Парижлив хьусса цилва аьрххилия, тийх хьумур совещаниялия. Гихунмайсса цилва ихтилатраву ванил кIицI лавгунни Франциянаву лавайсса даражалий ккаккан дуван аьркиншиву жулла республикалул аьдатру, культура, ляличIишиву, Дагъусттан ва Аьрасат, хъуннасса агьамшиву душиву Дагъусттаннал ва Дарбантуллал Кьинирду Парижлив даврийн хIадур хъанахъисса давуртту дуллай, сакиншиннарал комитетрал циняв членталгу, зузи группагу щиривкIуну зузаврил ва му даврихгу багьайсса къулагъас дикIан аьркиншиву.
Совещаниялувух гьуртту хъанахъиминнал цасса пикрилийн бувну, хIадуршиннарал масъалартту цал архIал, цачIу бачин буван, чIун-чIумуй ца ккаккан бувсса масъалалун хасъсса хьунабакьавурттугу дуллан аьркинну бур. Ми гьантрай Парижлив хьунтIисса выставкардайн, концертирттайн хIадур хъанай, сахIна ва майдан щаллу баврийн, техникалулмур масъала щаллу баврийн, печатьрал продукция, сувенирду даврийн багьайсса ва цаймигу масъаларттурив чIявур сакиншиннарал комитетрал хьхьичI бавцIусса. Мукунма агьам­сса масъаларттуну бур Парижлив Дагъусттанная бувкIми бацIансса кIанттулсса, ми дуки-хIачIиялул щаллу баврилсса бавугу.