Апрельданул 1-нний ДР-лул культуралул министрнал хъиривчу Елена Гьарунова хьунабавкьунни Дагъусттаннал паччахIлугърал къавтIаврил «Лезгинка» ансамбльданул ветерантуращал. Му батIаврийн бувкIун бия «Лезгинка» ансамбльданул директор Жамбулат МахIаммадов ва художествалул каялувчи Зулумхан Хангереев.
Ансамбльданул директорнал бувсунни чIал къавхьуну байбишинтIишиву «Лезгинкалул» КъавтIаврил къатта буллай, микку бюхъантIишиву коллективраща рахIатну цалла репетициярду дуллан. Бувсунни, мукунма, микку бикIантIишиву коллективрал цIанихсса тарихрая, хьхьичIуннайшивурттая бусласисса музей.
— Музейравун увкIсса гьарцагу инсаннан чIалан аьркинссар ансамбльданул тарих. Ансамбльдануллив пахру банмур къачанссар, мунил ххуржинттаву 270-нния лирчусса наградартту дуссар, личIи-личIисса, — увкунни художествалул каялувчиналгу.
Елена Гьаруновал дакIнийн бувтунни чара бакъа аьркиншиву «Лезгинка» ансамбльданул Ветерантурал союз сакин дуван, правалуцIун, Союзрал регистрациялуцIун бавхIуми масъалартту щаллу буван Культуралул министерствалул юристурал кумаг бувантIишиву. КъавтIаврил къатта буллалиссаксса хIаллай, коллективраща бюхъантIишиву аьркинний Р. ХIамзатовлул цIанийсса Миллатрал библиотекалуву батIаван, мастер-классру баван. Мукунма бувсунни библиотекалул цания-ца залдануву ансамбльданун ккаккан бувну бикIантIишиву стенд, цих бурувгунгу коллективрал творчествалущал кIул хьун бюхъантIисса.
— Му бакъассагу, кIулсса куццуй, А. Тахо-Годил цIанийсса Дагъусттаннал паччахIлугърал цачIун бувсса тарихрал ва архитектуралул музейравугу ца экспозиция бикIан аьркинссар ансамбльданун хас бувсса. Жамбулат Мусаевич, вил каялувшиннаралу датIин аьркинссар чара бакъа аьркинсса суратру, документру, наградартту, костюмру ва мукунна цамургу, хIазсса, авадансса экспозиция хьуншиврул, — увкунни Е. Гьаруновал.
Хьунабакьаврий, мукунма, хьунни ихтилат ансамбльданул 3 шинавун хьунтIисса 60 шинал юбилейраягу. Цинявннал цасса пикри бунни муниннин итабакьин яргсса хъунмасса лу, ансамбльданул тарихрая бусласисса, мукунна «Дагестан» РГВК-лий дуван документал фильм.
