Апрельданул 3-нний МахIачкъалаллал бакIчи МахIаммад Сулаймановлул шагьрулул халкь кьамул бувну, вайннаясса аьрзирдах вичIидирхьунни. Ванащал архIал халкьуннал масъаларттах вичIидирхьунни шагьрулул бакIчинал хъиривчу Камил Изиевлул ва МахIаммадамин ХIажиевлул, шагьрулул шаннагу райондалул бакIчитурал ва хасъсса отделлал пишакартурал.
З. АьбдурахIманова
Шагьрулул бакIчинал ва кьини 7 инсаннал аьрзирдах ва масъаларттах вичIидирхьуну, цаппара бунийва щаллу бунни, цаппарагу, закондалул ххуллий цукун ци бан хъанай бурив ххалбувну, ччясса мутталий щаллу буван шайрив ххалбанну кунни.
Халкьуннаясса аьрзри тIурча бия личIи-личIисса. Ца цIусса багъ бугьан кумаг бувара тIий увкIун ивкIхьурча, ца ия ичIаллил шартIру къулай дуван кумаграл хъирив увкIсса. Масалдаран, Свердловлул кIичIираву ялапар хъанахъисса Валентина Перекотинал бувсунни, 2002 шинал ссуттил чIумал ларчIсса гужсса гъарал сававну щин гьансса ливневка дакъа тIий, цил ва ялагу 412 къатлун ва къатлувуцири хъуслин хъунисса зараллу хьуну, щилкIуй къулагъас къадурну тIий хIукуматрал къурушрал кумаг къабувшиву. Гания мукьахгу Валентинал бикъавсса кIану бивтун бакъар, амма хIакьинунингу канализациялул масъала щаллу къабувнува бусса бур.
Ва аьрзалун жаваб дуллай, шагьрулул УЖКХ-лул хъунама Зубайру Мустапаевлул бувсунни, ва адресрайсса ливневкалул масъала щаллу буваншиврул 150-200 метра дусса манзилданийх ремонтрал давурттив дан багьлай бушиву. МахIаммад Сулаймановлул амру бунни майрал ахирданийннин Свердловлул кIичIиравусса канализациялул масъала щаллу бан ва махъ буллунни МЧС-райн гъараллу сававну хьусса зараллу лахъан арцуйну кумаг бувара тIисса ходатайство тIайла дуккан.
Ленинккантлиясса Пайзулла Махтиевлул тавакъю бия багъ бугьансса аьрщарал 30 гектар дулара тIисса. Ванал мукъурттийн бувну, аьрщи ласун ччисса «Варис» тIисса жяматийсса суккушиннарал Атлыбоюн тIисса духсса шяравалличIа халкьуннал цIинцI-ччюрк дичлачисса аьрщи марцI дурну, гикку ахъулссаннул мурхьру бугьан ччай бусса бур. МахIаммад Сулаймановлул укунми масъаларттал жаваблувсса МахIаммадамин ХIажиевлуйн тапшур бунни хъирив лавну, Махтиевлул мурад щаллу бан.
Шиккува Пайзулла Махтиевлул бувсунни, Ленинккантлив дукIу, хъунмасса захIматгу бивхьуну, марцI дурсса КОР-данувун канализациялул турбарду экьинани бувну бушиву. Шиккугу шагьрулул бакIчинал ва иш къулагъас къадурну къакьабитан бакIрайн лавсунни. ЦачIанма бувкIсса шагьрулул халкьуннахьхьун бакIчинал махъ буллунни, цуппа ца аьрза тинмай къабувну, хъиривва ца бази буван.
