Республикалул цинярдагу районнай ва шагьрурдай, личIи-личIисса идарарттай, школардай най дур Ххувшаврил юбилейран хас дурсса мероприятияртту.
А. Аьбдуллаева
Лакрал райондалийсса цинявппагу школардайгу юбилейран хасну баян бувну буссия художественный самодеятельностьрал смотр-конкурс. Вай гьантрай дуклаки оьрчIал ккаккан дунни цалла хIадур дурсса программа Гъумук иш кIулсса жюрилул хьхьичI. ВицIхъиял махIлалия ва конкурсраву гьуртту хьунни Кьубиял, Карашрал, КIундиннал, Ккурккуллал, Кумиял, ГьунчIукьатIрал школарду.
Конкурсрай дия шанна номинация: оьрус мазрай ягу лакку мазрай военно-патриотический темалийсса балай учаву, мукунмасса шеъри буккаву ва оьруснал ягу Дагъусттаннал чичултрал произведениярттавасса инсценировка. ОьрчIру Ватан ххирану тарбия баврих мудангу хъуннасса къулагъас дусса Лакрал райондалул школардал цинявннал ххаллилсса программарду хIадур дурну дия. Конкурсраву гьуртту хьусса ряхвагу школалул дянив жюрилул лавайсса кьимат бивщунни Ккурккуллал школалул дуклаки оьрчIал хIадур дурсса программалун. Военно-патриотический темалийсса балайлул номинациялуву вайннал бувгьунни 1-сса кIану. ХьхьичI 10-мур классрал дуклаки оьрчI Гъужиев Минкаиллул, хъирив 9-10 классирдал оьрчIал хорданул хъинну ххуйну увкунни машгьур хьусса аьрали балайрдавасса «Смуглянка» тIисса балай. Мукунма 1-сса кIану бувгьунни вайннал школалул директор Даниял Магьдиевлул «Ниттил чагъар» тIисса поэмалувасса инсценировкалух. Муниву агьамми рольлу щаллу дунни 10-мур классрал дуклаки оьрчIру Гъужиев Минкаилул, Мажидова ПатIимал, Гъужиева Анисатлул ва цайминнал. Ва поэмалувасса парчагу дуклаки оьрчIал мяйжаннугу бюхханну, асар хьунну ккаккан бунни. Шеъри бувккунни 10-мур классраву дуклакисса Мажидова ПатIимал. Шеъри буккавриву жюрилул кьиматирттай ва кIилчин бувккунни. Цинярдагу номинациярдал хIасиллайн бувну Ккурккуллал школалун буллунни цалчинсса кIану. Дуклаки оьрчIащал ва программа хIадур дурну дия оьрус мазрал дарсирал учительница Гульнара Магьдиевал. Мунил дуллалимунил чIарав бавцIуну, аьркинмунин кумаг бувну бия тарихрал учительница Лия Буттаевал.
Учительтурал ва дуклаки оьрчIал хIарачат дузрайн бувккунни. Рязину бур оьрчIал нину-ппу ва шяраваллил жямат. Утти шяраваллил жяматрал тавакъю буллай, дуклаки оьрчIал ва программа шяраваллил клубравугу ккаккан дан тIий бур.
Ккурккуллал школалий оьрчIру Ватан ххирану тарбия баврих, дяъвилий ливтIуминнал аьпа абад баврих, сагъну зана хьуминнал хIурмат баврих мудангу хъуннасса къулагъас дуссар. ЦIанагу зий буссар школалул директор Д. Магьдиевлул сипталий бувсса, учительтурал тIиртIу дарсру дишайсса, хъамаллуран мудан нузру тIиртIусса Музей боевой славы.
Ккурккуллал шяраву Даниял Магьдиевлул каялувшиннаралу гьарица шинах лахъа-хъунну кIицI дувайссар Ххувшаврил байран. ЦIанагу вай хIадур хъанай бур Ххувшаврил юбилейрайн.
ЧIирисса Ккурккуллал шярава 128 инсан лавгссар дяъвилийн, 57 зана къавхьуссар. Ва байран Ккурккуллал шяраву яла бусравмур байранни.
