ОьрчIру Ватан ххирану тарбия баву, буттахъал ххаллилсса аьдатру кьадрулий дуруччаву мурадрай дуллалисса хъуннасса даврихлу, Бюхттулсса Ххувшаврил юбилейрайнсса ххуйсса хIадуршиннарахлу, Ккурккуллал школалул директор Даниял Магьдиевлун Аьрасатнал коммунист партиялул чулуха дуркIунни ва партиялул бакIчи Г.А. Зюгановлул къулбасращалсса барча уллалисса телеграмма ва «70 лет Победы» тIисса медаль.
Барча уллай буру Даниял МахIаммадаьлиевич бусравсса наградалущал. ХIурмат бусса Даниял МахIаммадаьлиевич! Инара дачин дуллалисса ххаллилсса даву цимирагу шинай ттигу дуллансса цIуллушиву дулуннав вихьхьун, гьарица хъиндайдихьу дузрайн дуккаваннав.
Ккурккуллал школалул
учительтурал коллектив ва дуклаки оьрчIру
————————————————————-
ХIакьину ххаллилсса вираттиричув Абакаров Сани Ссунгъуровичлул къатлуву хъанай дур кIира байран – Ххувшаврил байрандалущал Сани Ссунгъурович ниттил увну 83 шингу бартлаглай дур.
40 шинай личIи-личIисса азарханардай хирургну зий Сани Ссунгъурович цала дакIнийхтуну бихьлахьисса захIматрайну, ххишала акъа хъинсса дакI-аьмалданийну, усттаршиврийну лайкь хьуссар къашайшалтрал, даврил уртакьтурал чулухасса хIурматрангу, «ЗахIматрал ветеран», «Лахъсса даражалул хIакин», «ДР-лул лайкь хьусса хIакин» тIисса цIардангу. Жул Ккурккуллал жяматрангу хъиннува бусравссар, ххирассар Сани Ссунгъурович. Ккурккуллал жяматрал, хаснува Ккурккуллал дянивмур даражалул школалул 3-мур выпускрал, цIания барча уллай ура МахIаммад-Сани кIирагу байрандалущал. Дулуннав вихьхьун цIуллушиву, бартлаганнав цинявппагу вил мурадру. ТачIав яла къагьаннав вил мурччая пиш.
Нариман Щайхов
—————————————————
Барча хьуннав тIий буру жулла аьзизсса нину АьвдурахIманова Жансият дурсса ххарисса кьини. ЧIа тIий бур ванин чIярусса цIуллусса шинну, цIу-цIусса ххуй-хъиншивуртту. Яданнав ина жун Заннал!
Интнил шадсса кьини,
Май зурул ххюнний,
Ххяххабаргъ ялувну
Дурссар жул нину.
Чан къаданнав, дадай,
Ина жун тачIав,
Ина жуйн бивтнасса
Бургъил чанира.
Винмагу ххирасса, инавагу ххирасса оьрчIру, оьрчIал оьрчIру
ш. ЦIуссачIурттащи
