МахIачкъалалив, Дагъусттаннал Журналистурал союзрал къатраву хьунни ниттил мазру машгьур баврин, буруччаврин хас бувсса «ккуркки стол». Ва давривух гьуртту хьунни «Аналитика» порталданул каялувчи Аьдил Баянов, ДНЦР-далул элмийсса пишакар Саид Ниналалов, «Илчи» кказитрал хъунмур редактор Качар ХIусайнаева ва республикалул миллатирттал мазурдийсса СМИ-рдал жураналистал.

И. Саидова
«Ккуркки столданул» даву дайдихьлай, Аьдил Баяновлул бувсунни, миллатирттал мазру ябаву ва буруччаву мурадрай, ва порталданий ми мазурдийсса макьалартту ришлай бушиву.
— Ми макьалартту ришлай байбивхьуния шихунмай, гьарза хьунни чIявусса буккулт. Мунияту жу сакин дуллай буру миллатирттал мазурдийсса макьалартту ришлансса сайт. Яла-яла ва сайтрай дикIан аьркинссар мазрацIун бавхIусса масъаларттаясса макьалартту. Мукунма шикку ришлантIиссару цалва миллатирттал мазурдий ва оьрус мазрайн таржума дурсса жагьилтурал макьалартту. Ва сайтрал даву дайдихьлай, на маслихIат ккак­лай ура цуманал цукунсса пикри буссарив ххалбан, — увкунни Аьдил Баяновлул.
Ванал бувсунни мукунна сайт­рай рищун бюхъайшиву оьрчIал ва жагьилтурал ниттил мазурдий ларсъсса чIири-хъунсса видеосюжетругу.
— Вай сюжетирттайну инсантуран, кунная куннал ххалдуллай, хъунмасса мюнпат хъанай бур. Мукунна махъсса ппурттуву бу­ккултран хъинну салихI дизлай дур Дагъусттаннал тарихраясса очеркру. Ттун ччива мукунсса макьаларттугу ва сайтрайн гьарзану чичлай, — увкунни ванал.
Ва батIаврил давриву ихтилат багьунни хIакьинусса ниттил мазурдил тагьардания ва ми буруччаву ва ябаву мурадрай дан-дитанмуния. МаслихIат ккавккунни, цинявппа цачIун хьуну, луглан, уттизаманнул технологиярттугу ишла дурну, ни­ттил мазру машгьур баву, буруччаву мурадрайсса ххуллу-чараннах.
«Илчи» кказитрал хъунмур редактор Качар ХIусайнаевал кIицI лавгунни ниттил мазурдил ялун бучIантIимур дакI ххари хьунсса бакъашиву.
— КъакIулли цайми мазурдил тагьар цукунсса дуссарив, лакку мазралмур тIурча хъинну нигьачIийсса дур. Ттул пикрилий, ниттил мазурдил тагьар вара даражалий личIарча, ца 10-хъул шиная тихунмай маз бухва лаганссагума ххай бура, — увкунни Качар ХIусайнаевал.
Сяид Ниналаловлул тIурча кIицI лавгунни мазурдил тагьар мукссара нигьачIаву дуну дакъашиву, ва жулва мазру так ичIува, кулпатирттаву бакъа якъахьунтIишиву. Ванал бувсунни «Мавраевъ» тIимур басмаханалий итабавкьушиву яру­ссаннал мазрайн таржума бувсса «Барон Мюнхгаузеннул приключениярттаясса» лу. Ва цIана вай луглай бур цаймигу дагъусттаннал мазурдийн ва лу таржума бувансса инсантурах. Мукунма Ниналаловлул бувсунни ниттил мазру машгьур баву, ябаву мурадрай ва басмаханалул сакин дурсса цаймигу проектирдая, итабавкьусса луттирдая.