«Учитель года – 2015» конкурсрай шамилчинмур кIану бувгьунни Гъумучиял лицейрал биологиялул учительница Асият ХIасановал.
Апрель зурул 6-10-нний МахIачкъала шагьрулул 22-мур лицейраву хьунни республикалул конкурс «Учитель года-2015».
Зулайхат Тахакьаева
Педагогикалул зузалтрал творчествалул даву, кIулшиву дулаврил цIусса стандартру, кIулшиву дулавриву цIу-цIусса технологияртту ишла дуллалаву хьхьичIуннай даву, педагогтурал пишакаршиврул усттаршиву ларай даву мурадрайсса учительтурал конкурс Дагъусттаннай буллай бур 1991 шиная шихунмай.
Мунил сакиншинначитурал бусласаврийн бувну, конкурсрал кабакьу бувну бур гьунар бусса ва даврийн дакI тIайласса педагогтал ялун личин бан.
Республикалул конкурсгу, щалвагу аьрасатналмур кунма, гьашину буллай бур 24-чин.
«Учитель года России» конкурсрал тарихраву Аьрасатнал хьхьичIунсса ххюя учительнал сияхIравун Дагъусттаннаясса учитель агьну ур 2013 шинал — Шамильский райондалул школалул тарихрал учитель Ахбердило Ахбердилов лайкь хьуну ур «Хрустальный пеликан» лишандалун.
Конкурсрая конкурсрайн хъун хъанай дусса дур педагогнал пишакаршиврул тIалавшиннардугу. Гьашину конкурс бувну бур 5 зоналий, мунийну конкурсрай гьуртту хъанахъиминнал аьдадгу хъунна хьуну дур. Республикалул конкурсрай гьуртту хьунни муниципал конкурсирдайгу, зональный конкурсирдайгу хьхьичIунсса кIантту бувгьусса 22 учитель, миннаву шагьрурдаясса 4 ва районнаясса 19 ия.
Конкурсрал финал хьунни 5 турданий. Цалчинмур турданий («Учитель-профи», му цурдагу хьунни 3 кьини) гьуртту хъанахъиминнан багьлай бия ФГОС-рал тIалавшиннардай дарс дишин. КIилчинмур турданийн («Мастер-класс») итаавкьунни цалчинмур турданул хIасиллайн бувну яла хьхьичIунсса 10 учитель. Муний учительтурал ккаккан бунни дарс дишаврил цалла-цалла методикалул хасшивуртту. КIилчинмур турданий ххув хьусса 5 учитель увккунни финалданийн. Гьашинусса конкурсраву захIмат бувну бия финалданийн бувкминнал конкурсгу. Шамилчинмур турданий («Педагогический совет») учительнан багьлай бия ккаккан бан цала авторшиврул ва гражданшиврул хIучча. Мукьилчинмур турданий («Образовательный проект») учительнан багьлай бия цала хIадур бувсса кIулшиву дулаврил проект, ххалгубивгьуну, жюрилул хьхьичIун ласун.
Конкурсрай ххув хьуми барча буллалисса шадлугъ хьунни ххуллун кьини «Дворец культуры» ГБУ-луву. Конкурсрал гьурттучитал барча буллай, ДР-лул ХIукуматрал Хъунаманал цалчинма хъиривчу Анатолий Карибовлул кIицI лавгунни кьуниясса шиннардий буллай бухьурчагу, «Учитель года» конкурсрал сий ялу-ялун ларай хьурча дакъасса, яларай дагьлай дакъашиву, муний гьуртту хьун ччимигу шиная шинайн гьарза хъанай бушиву гьарцагу районнай. Бувсунни кIулшиву дулаву хьхьичIуннай дан махъсса шиннардий республикалий чIярусса давуртту дуршиву. «Человеческий капитал» проектрал лагрулуву тамансса дуршиву оьрус мазрал дарсру дишаврил даража лавай бансса ва миллатирттал мазру ябансса давуртту. КIицI лавгунни ларгсса шинал ЕГЭ дулавривугу республика хьхьичIуннай хьушиву, жущава «марцI буккан» бювхъушиву. Амма ттигу ливчIун бушиву биттур къабувсса чIявусса суаллу – кIулшиву дулаврил даража лавай баврищал, педагогтурал даврил кьиматгу лавай бан.
— «Учитель года» конкурс так пишакаршиврул конкурс бакъар, ва бур кIулшивурттал, гьунарданул ва яхIлил конкурс. КIулшиву дулаврил аралуву махъсса шиннардий дурсса давурттая гъалгъатIурча, яла агьаммур хьхьичIуннайшивуну, ттул пикрилий, хьуссар ЕГЭ лайкьну дулаву дакъача, педагогтурал ва нитти-буттахъал аькьлу-кIулши даххана дан бюхъаву, жула оьрчIал кIулшиву дулаврил ялув бацIан багьлай бушиву жунма, ахиргу, бувчIаву, — увкунни ДР-лул Халкьуннал Мажлисрал КIулшиву дулаврил ва элмулул комитетрал хъунама АьбдулхIалим Мачаевлул.
Конкурсрай гьуртту хьусса учительтуран грамотарду дуллунни Дагъусттаннал Ветерантурал советрал хъунама, Хъун дяъвилул ветеран, 1958 шиная мукьах махъсса шиннардий учительну зий ивкIсса бусравсса педагог МахIаммад Кьадировлул. Ванал кIицI лавгуна цалва кулпатраву учительнал кьимат мудангу бюхттулну бивкIшиву. Ванал ппу ивкIун ур 1929 шиная 1958 шинайннин учительну зий. Цалагу ппу школалия лавгсса шиналва ганал кIану бувгьуну бур. Гайннал кулпатраву ряхагу арснал язи бувгьуну бур учительнал пиша. Ряхагу лавгун бур ватан дуручлан, кIия дяъвилия зана къавхьуну ур.
Бувсунни хъирив нанисса ник ватан ххирану тарбия дан Ветерантурал советрал дуллалисса давурттаягу. Учительтурал маслихIат бунни дяъвилул ветерантуращалсса хьунабакьавур_тту школарттай чIумуя-чIумуйн сакин дуллан, дуклаки оьрчIан дяъвилул гьурттучитурал зумату балланшиврул дяъвилуя.
Грамоталун лайкь хьунни Новостройрайсса Чапаевкаллал школалул тарихрал ва обществознаниялул учительница Асбарова Сусанна.
Конкурсрай ххувхьуминнан бахшишру дуллунни ДР-лул кIулшиву дулаврил ва элмулул министр Шахабас Шаховлул. Ванал бувсуна ларгсса шинал республикалул кIулшиву дулавриву хьусса тIайлабацIурттая ва хьхьичIуннайшивурттая.
Гьашину республикалий сакин дурну дусса дур Оьрус мазрал учительтурал ассоциация. Республикалул БакIчи Рамазан АьбдуллатIиповлул сипталийну ва кабакьаврийну октябрь зуруй дан дакIний бусса бур щалагу Аьрасатнал Оьрус мазрал учительтурал съезд.
Гьашинусса шин Ххувшаврил 70 шин шаврил юбилейрал шин хъанай духьувкун, барчаллагь увкуна КIулшиву дулаврил министерствалун ттарцIну ва эбратну хъанахъисса ветерантурахь. Бувсуна юбилейран хасъсса хьунабакьавуртту хьунтIишиву гьарцагу дуккаврил идаралий.
ХьхьичIунсса кIантту бувгьусса учительтуран премияртту дуллуна Дагъусттаннал кIулшиву дулаврил ва элмулул зузалтрал профсоюзрал хъунама МахIаммад Амиродиновлул.
Шадлугъ чIюлу дуруна ДР-лул КIулшиву дулаврил ва элмулул министерствалучIасса «Ватан» ансамбльданул къавтIалтрал.
